काठमाडौं / राष्ट्रिय स्वतन्त्र पार्टी (रास्वपा)ले प्रधानमन्त्री केपी शर्मा ओलीको राजीनामा माग गरेको छ । आज नयाँ बानेश्वरमा भएको आन्दोलनलाई दमन गरेर हिंसात्मक बनाएको आरोपसहित रास्वपाले प्रधानमन्त्री ओलीको राजीनामा माग गरेको हो ।
पार्टीका महामन्त्री कविन्द्र बुर्लाकोटीको हस्ताक्षरमा रास्वपाले जारी गरेको विज्ञप्ति भनिएको छ, ‘राष्ट्रिय स्वतन्त्र पार्टी (रास्वपा) ले जेन–जीले आयोजना गरेको शान्तिपूर्ण प्रदर्शनमा सरकारले गरेको दमनको कडा निन्दा गर्दै प्रधानमन्त्रीलाई तत्काल राजीनामा दिन माग गरेको छ ।’ साथै, रास्वपाले ताजा जनादेशका लागि अर्ली इलेक्सनको समेत माग गरेको छ ।
वर्तमान सरकारको औचित्य पूर्णतः समाप्त भइसकेको परिप्रेक्षमा प्रधानमन्त्रीको तत्काल राजीनामा समेत माग गरेको हो । साथै घटनाको निष्पक्ष छानबिन गर्न उच्चस्तरीय न्यायिक छानबिन आयोग गठन गरी गृहमन्त्री लगायत सबै दोषीमाथि कडा कारबाही गर्न माग समेत गरेको छ ।
नेपाली कांग्रेस र नेकपा एमालेको वर्चस्व रहेको वर्तमान सङ्घीय संसद्ले कुनै पनि राष्ट्रिय मुद्दाको हल निकाल्न असमर्थ भई वैधता गुमाएको निष्कर्षमा पुग्दै ताजा जनादेशको माग रास्वपाले गरेको हो ।
सरकारबाट हत्या गरिएका जेनजी योद्धाहरूप्रति हार्दिक श्रद्धाञ्जली अर्पण गर्दै घाइते भएका सबैको निःशुल्क उपचारको व्यवस्था गर्न माग समेत गरेको छ ।
