पोखरा /पोखरा अन्तराष्ट्रिय विमानस्थलबाट मंगलबार पहिलोपटक भारतको भोपालका लागि मेडिकल रेस्क्यू चार्टर उडान भएको छ । उक्त उडान भारतको भोपाला (पुरानो नाम राजा भोज) विमानस्थलका लागि गरिएको पोखरा अन्तराष्ट्रिय विमानस्थलले जनाएको छ ।
विमानस्थलका सूचना अधिकारी आशिष प्रकृति धितालका अनुसार मुक्तिनाथ तीर्थयात्राका क्रममा बिरामी परेका भारतीय नागरिक शम्भु दयाल श्रीवास्तवलाई थप उपचारका लागि विशेष चार्टर उडानमार्फत भोपाल पठाइएको हो । श्रीवास्तव मुक्तिनाथ क्षेत्रबाट फर्किदा बिरामी भएपछि उद्धार गरी पोखराको चरक मेमोरियल अस्पतालमा भर्ना गरिएको थियो । अस्पतालमा ५ दिन उपचारपछि थप उपचारका लागि परिवारले जहाज चार्टर गरेको हो ।
चार्टर उडानमा बिरामीका दुई छोरा, चरक अस्पतालका ३ चिकित्सक र ६ जना चालक दलका सदस्य रहेका छन् । श्री एअरलाइन्सको उक्त विमान मंगलबार दिउँसो ३ बजेर ८ मिनेटको समयमा पोखराबाट भोपालका लागि उडेको धितालले बताए । बिमान डेढ घन्टामा भोपाल पुग्ने र काठमाडौं फर्किने छ ।
पोखराबाट भारतका लागि यो पहिलो डिपार्चर चार्टर उडान हो । यसअघि भारतको दिल्ली हुँदै एउटा विदेशी चार्टर उडान पोखरा आएको थियो, तर फर्किने उडान बंगलादेश गएको थियो । यसअघि पोखराबाट चीनको ल्हासा,छेन्दू , भुटान र सिंगापुरबाट चार्टर तथा विशेष उडान भइसकेका छन् ।
