काठमाडौं, १ पुस – सर्लाहीमा आगोले जलेर दुई बालिका र एक वृद्धसहित तीनजनाको मृत्यु भएको छ । मृत्यु हुनेमा कबिलासि नगरपालिका ७ सिरसियाका जोगी महरा चमारकी ८ वर्षीया छोरी लक्ष्मी कुमारी र ३ वर्षीया छोरी सोगान्धी कुमारीको मृत्यु भएको हो।
त्यसैगरी, मलंगवा नगरपालिका -६ खुटौनाको ७० वर्षीय वृद्ध नसिर खाँको मृत्यु भएको जिल्ला प्रहरी कार्यालय सर्लाहीले जनाएको छ। बुधबार राति सवा ९ बजेतिर विद्युत सर्ट भइ आगलागी हुँदा चमारको फुसको कच्ची घरमा आगलागी भएको थियो।
घरमा बस्दै आएकी छोरी लक्ष्मी र सोगान्धी जलेर गम्भीर घाइते भएकी थिइन् । दुबैजनाको जिल्ला अस्पताल मलंगवामा उपचारपछि थप उपचारका लागि काठमाडौं लैजाँदै गर्दा बाटोमै मृत्यु भएको जिल्ला प्रहरी कार्यालय सर्लाहीका प्रहरी नायव उपरीक्षक माधव प्रसाद बुढाथोकीले जानकारी दिएका छन् ।
समान्य घाइती भएकी चमारकै अर्की छोरी ५ वर्षीय सुधा कुमारीको स्थानीय मेडिकलमा उपचारपछि घर पठाइएको प्रहरीले जनाएको छ । आगो स्थानीयबासी र प्रहरीको सहयोगमा करिब २५ मिनेटपछि आगो नियन्त्रणमा लिएको थियो ।
आगलगीमा चमारको करिब ५० हजार बराबरको क्षति भएको छ । त्यसैगरी जाडोबाट बच्नका लागि परालको घुर बाली आगो ताप्दै गरेका नासिरको कपडामा एक्कासी आगो सल्किदा ज्यान गएको प्रहरीले जनाएको छ ।
नासिर करिब साढे ११ बजेतिर घरभन्दा ५ सय मिटर पर आगो ताप्न गएका थिए । कपडामा आगो लागेपछि छटपटाउँदै उनी छेउकै नालीमा गएर खसेका थिए । प्रहरीको गस्ती टोलीले नालीमा खसेको अवस्थामा नासिरको उद्धार गरेका थिए ।
आगोले पोलेर गम्भीर घाइते भएका नासिरलाई प्रहरीले उपचारका लागि जिल्ला अस्पताल ल्याएका थिए । उनको उपचारको क्रममा बिहीबार बिहान सवा ७ बजेतिर मृत्यु भएको प्रहरीले जनाएको छ।
