काठमाडौं, ३ पुस – नेपाली कांग्रेसको १४ औं महाधिवेशन अन्तर्गत भएको केन्द्रीय कार्यसमितिको निर्वाचनको मतगणना र मतपरिणाम आउने क्रम जारी छ ।
आज केन्द्रीय सदस्य खुलातर्फको मतगणना गर्न भइरहेको छ । बिहान साढे ११ बजेबाट मतगणना सुरु भएको छ । सुरुमा तीन ठाउँबाट सुरु गरिएको मतगणना अहिले ११ ठाउँमा भइरहेको छ ।
दिउँसो ३ बजेसम्म प्रत्येक ठाउँमा ५०/५० का दरलले मतगणना भएको निर्वाचन समितिले जनाएको छ । १०० मतगणना भएपछि सार्वजनिक गरिने समितिले बताएको छ । एकपटकमा ११०० मतकाे परिणाम सार्वजनिक हुनेछ ।
खुलातर्फ ३५ जना केन्द्रीय सदस्य निर्वाचित हुनेछन् । ३५ सदस्यका लागि ९९ जना प्रतिष्पर्धामा छन् ।
पदाधिकारीको मतगणना सम्पन्न भइसकेको छ । कांग्रेसको नयाँ नेतृत्वमा सभापतिमा शेरबहादुर देउवा, उपसभापतिमा पूर्णबहादुर खड्का र धनराज गुरुङ, महामन्त्रीमा गगन थापा र विश्वप्रकाश शर्मा, सहमहामन्त्रीमा महालक्ष्मी उपाध्याय, जीवन परियार, भीष्मराज आङ्देम्बे, फर्मुल्लाह मन्सुर, किशोरसिंह राठौर, महेन्द्र यादव र उमाकान्त चौधरी निर्वाचित भएका छन् ।
