बागलुङ, १४ पुस – आफ्नै श्रीमानको हत्या अभियोगमा बागलुङकी एक महिला कारागार चलान भएकी छन् । जिल्ला अदालत बागलुङको आदेशमा निसीखोला गाउँपालिका-६ खार्चङकी २३ वर्षीया मोनिका बुढा मगरलाई पूर्पक्षका लाथि थुनामा पठाईएको हो । आफ्नै श्रीमान ३१ वर्षीय टेकबहादुर बुढा मगरको हत्या गरेको आरोपमा उनी हिरासतमा थिईन् ।
मोनिकाले मंसिर ९ गते राती श्रीमानको हत्या गरेको प्रारम्भिक अनुसन्धानबाट खुलेको प्रहरी प्रतिवेदनमा उल्लेख छ । मृतक बुढा मगर घरको आँगनमा मृत अवस्थामा फेला परेका थिए । प्रहरीले अनुसन्धान पुरा गरेर सरकारी वकिल कार्यालयमार्फत प्रतिवादी तथा मिसिल जिल्ला अदालतमा पेस गरेको प्रहरी नायव उपरीक्षक इकवाल हवारीले जानकारी दिए ।
यस्तै, प्रहरीले विगत ११ वर्षदेखि फरार एक अभियुक्तलाई पक्राउ गरेको छ । कर्तव्य ज्यान मुद्दामा जिल्ला अदालत बागलुङबाट २०६७ साल असोज ३ गते २० वर्ष कैद फैसाला भई फरार जैमिनी नगरपालिका-१० का ४६ वर्षीय बलबहादुर पुनलाई घरबाटै पक्राउ गरेको हो ।
घरमै लुकीछिपी बसेको अवस्थामा फेला परेका पुनलाई लगत कट्टाको लागि अदालत पेस गर्दा अदालतले कारागार चलान गरेको डीएसपी हवारीले बताए ।
