लण्डन, ८ माघ – बेलायत सरकारले कोभिड-१९ विरुद्ध लगाएको प्रतिबन्ध हटाएको छ । सरकारले बिहीबारदेखि लागु हुनेगरी कोभिड-१९ प्रतिबन्ध हटाएको हो । बेलायतका प्रधानमन्त्री बोरिस जोनसनले सो जानकारी दिएका हुन् ।
कोभिड १९ को नयाँ भेरियन्ट ओमिक्रोनले देशभर चरम अवस्था पार गरिसकेका कारण सरकारले सो प्रतिबन्ध हटाउने निर्णय गरेको प्रधानमन्त्रीले बताएका छन् ।
सो निर्णयसँगै वर्क फ्रम होम र विद्यार्थीले कक्षा कोठामा अनिवार्य मास्क लगाउनुपर्ने लगायत नियम हटेको स्काइ न्युजमा खबर छ । आगामी बिहीबारदेखि लागु हुनेगरी सार्वजनिक स्थानमा मास्क लगाउनुपर्ने र साना ठूला सार्वजनिक कार्यक्रममाथि लागेको प्रतिबन्धसमेत हट्ने बताइएको छ ।
बेलायत सरकारले गएको डिसेम्बरदेखि कोभिड १९ विरुद्ध नयाँ प्रतिबन्ध लागु गरेको थियो ।
