बागलुङ, २१ माघ – बागलुङका बामपन्थी नेता बाबुराम नेपाली शुक्रवार नेकपा एमालेमा प्रवेश गरेका छन् । बामपन्थी नेता नेपालीलाई नेकपा एमालेका उपमहासचिव पृथ्वीसुब्बा गुरुङ, सचिव तथा गण्डकी प्रदेश इन्चार्ज पद्मा अर्याल, सहइन्चार्ज जगत विक, मन कुमारी केसी लगायतका नेताहरुले जिल्लाको ढोरपाटन नगरपालिकामा आयोजित एक कार्यक्रमका विच फुलमाला लगाइ प्रवेश गराएका हुन् ।
एमालेमा प्रवेश गर्दै बामपन्थी नेता नेपालीले कम्युनिष्टका नाममा साना साना झुण्डको आवश्यकता नरहेको भन्दै अब एउटै कम्युनिष्ट पार्टीले मात्रै नेपाली जनताको समस्या समाधान गर्ने र राष्ट्रिय एकतालाई सुदृढ बनाउन सक्ने वताए । उनले छरिएर रहेका सवै वामपन्थी कम्युनिष्टहरुलाई एमालेमा समाहित हुन समेत आग्रह गरे ।
लामो समय नेकपा मसालको राजनीति गरी माओवादीमा प्रवेश गरेका नेपाली पछिल्लो समय उक्त पार्टीबाट पनि अलग भई स्वतन्त्र भएका थिए । गलकोट नगरपालिका-११ का उनी राष्ट्रिय जनमोर्चाको तर्फबाट तत्कालिन रिघा गाविस अध्यक्ष बनेका थिए ।
त्यसपछि उनी जनमोर्चा परित्याग गरी माओवादी केन्द्र प्रवेश गरेका थिए । माओवादी पनि विभाजित भएपछि उनी स्वतन्त्र बामपन्थी बनेका थिए ।
