बागलुङ, ३ फागुन – शिव शिखर बहुउद्देश्यीय सहकारी संस्था लिमिटेडले बागलुङमा एटीएम सेवा शुरू गरेको छ । बागलुङमा रहका दर्जनौं सहकारीसंग प्रतिस्पर्धा गर्दै सहकारीले आफ्नो बजार समेत बिस्तार गर्दै जान थालेको छ ।
आफ्नो शेयर सदस्य र सहकारीमा खाता संचालन गरेका ब्यक्तिलाई बैकिङ्ग सेवा दिने उदेश्यले एटीएम सेवा सुरु गरेको सहकारीले जनाएको छ । एटीएम सेवाको शुभारम्भ बागलुङ नगरपालिकाका नगरप्रमुख जनकराज पौडेलले सोमबार एक कार्यक्रमवीच गरे ।
कार्यक्रममा नगर प्रमुख पौडेलले सहकारी संस्थाहरुलाई पनि पेपरलेश (कागजविहीन) बनाएर प्रविधिमा आधारित सहकारी संस्था बनाउनुपर्नेमा जोड दिए । सहकारीको अर्थ सहकार्य भएको भन्दै उनले सहकारी संस्थाहरुले सर्वशुभल रुपमा आफ्नो शेयर सदस्यलाई सेवा दिनुपर्नेमा धारणा राखे ।
सहकारीले किसानलाई लक्षित गरी कृषी उपज खरिदबिक्री केन्द्र संचालन गरिसकेको र दाङ जिल्लामा जग्गा खरिद गरि रोल्पा रूकुमका किसानलाइ फाइदा पुग्ने अदुवा बेसार सुकाउने अत्याधुनिक प्लान्ट स्थापना गरेको सहकारी संस्थाका प्रमुख कार्यकारी अधिकृत लीलानाथ गौतमले बताए ।
कोरोनाको जोखिम उच्च भइरहेको समयमा सहकारीले प्रविधिमैत्री काम अगाडि बढाइएको अहिले एटीएम सेवा ल्याएर आफ्नो शेयर सदस्यलाई सेवा दिएको सहकारीका अध्यक्ष सुशील बानियाँले बताए ।
कार्यक्रममा बागलुङ नगरपालिकाका वडा नम्बर २ का वडा अध्यक्ष जीवन आचार्यले शुभकामना मन्तब्य राखेका थिए । कार्यक्रम संचालन सहकारीका बागलुङ प्रमुख विष्णु भुसालले गरेका थिए ।
