काठमाडौं, ६ फागुन – अमेरिकी सहयोग परियोजना एमसीसी संसदमा टेबल गर्न सत्तारुढ गठबन्धनमा सहमति नजुटेपछि प्रधानमन्त्री शेरबहादुर देउवाले प्रमुख विपक्षी नेकपा एमालेसँग सम्वाद बढाएका छन् । देउवाले एमाले अध्यक्ष केपी शर्मा ओलीसंग एमसीसी पास गर्न र सरकार समेत सहभागी हुन गुहार मागेका छन् ।
सत्तारुढ चार दलका शीष नेताहरुको बैठकलगतै पत्नी आरजु राणासहित बालकोट पुगेका देउवाले विहिवार एमाले अध्यक्ष ओलीसँग लामो छलफल गरेर गुहार मागेका हुन् । बिहीबार नै सत्तारुढ चार दलको बैठकअघि कांग्रेस नेता मिनेन्द्र रिजालले एमाले अध्यक्ष केपी शर्मा ओलीलाई भेटेका थिए । सूचना प्रविधि तथा सञ्चारमन्त्री ज्ञानेन्द्रबहादुर कार्की पनि एमाले नेताहरु एमालेसंग निरन्तर सम्पर्कमा छन् ।
बालकोट जानुअघि बालुवाटारमा बसेको सत्तारुढ चार दलको बैठकमा पनि प्रधानमन्त्री देउवाले शुक्रबारको संसद बैठकमा एमसीसी टेबल गर्न सहमति मागेका थिए । तर गठबन्धनका दलहरुले एमसीसी संसदमा टेवल गर्न संसद अवरोध हट्नु पर्ने आफ्नो पुरानै अडान दोहोराएका थिए ।
झन्डै डेढ घण्टा भएको छलफलमा ओलीले देउवालाई आफ्नो वाटो आफै तय गर्न भनेका थिए । उनले सत्ता गठवन्धन तोडेर आएमा मात्रै सोच्न सकिने वताएका थिए ।
