पोखरा, ६ फागुन – नेपाली कांग्रेसका केन्द्रीय सदस्य गुरु बरालले अमेरिकी सहयोग कार्यक्रम (एमसीसी) र चिनियाँ सडक कार्यक्रम (बीआरआई) जस्ता वैदेशिक सहयोग राष्ट्र हितमा रहेको जिकिर गरेका छन् ।
एमसीसी परियोजना लागू नभए अबको ५ वर्षपछि नेपालमा उत्पादित विद्युत खोलामा फाल्नुपर्ने अवस्था आउने उनले ठोकुवा पनि गरे । नेपाली कांग्रेस पोखरा ६ ले अयोजना गरेको ४ नम्बर टोल कार्यसमिति गठनसहित जेष्ठ नागरिक सम्मान कार्यक्रमको उद्घाटनमा उनले अरुण तेस्रो आयोजना फिर्ता पठाउँदाको नेपालीले १० वर्ष लोडसेडिङ मार खेपेर अँध्यारोमा बस्नु परेको पुरानो कुरा पनि सम्झाए ।
उनले वैदेशिक सहयोगलाई अनर्गल रुपले प्रचार नगर्न वामपन्थी दलहरुलाई आग्रह पनि गरे । टोल समितिको दोश्रो अधिवेशनबाट गुरुदत्त कोइराला(रामजी) लाई सर्वसम्मत सभापतिमा चयन भएका हुन् ।
टोलको उपसभापतिमा झलक सुवेदी, सचिवमा लेखनाथ भुसाल,कोषाध्यक्षमा दीपक भट्टराई र सहसचिवमा विष्णु गिरी चयन भएका छन् । बाँकी सदस्य समितिले नै मनोनित गर्नेगरी समिति गठन भएको हो ।
