बागलुङ, २१ फागुन – एमसीसी खारेजीको माग गर्दै राष्ट्रिय जनमोर्चा बागलुङले सदरमुकाम बागलुङ बजारमा शनिवार बिरोध सभा गरेको छ । लोकतान्त्रिकचोकमा भएको बिरोध सभालाई संबोधन गर्दै राष्ट्रिय जनमोर्चाका केन्द्रीय महासचिव मनोज भट्टले एमसीसी परियोजना बिकास योजनाको उदेश्यले आए जस्तो देखिए पनि यो देशको सुरक्षा सैन्य रणनीतिसँग जोडिएको वताए ।
मसीसीका कारण देशको सार्वभौम सत्ता खतरामा पार्ने बताउदै महासचिव भट्टले ५५ अर्ब अनुदानको नाममा देशको राष्ट्रियतालाई बन्धक बनाउन नहुनेमा जोड दिए । उनले सत्तासिन पार्टीहरुले कार्यकर्ताहरुलाई सडकमा बिरोध गर्न पठाएर नेताहरुले भने सदनबाट एमसीसी पारित गरेको आरोप लगाए ।
कार्यक्रममा राष्ट्रिय जनमोर्चा केन्द्रीय सदस्य तथा जिल्ला समन्वय समिति बागलुङका प्रमुख राजेन्द्र ढुङगानाले बिगतमा कोशी, गण्डकी, महाकाली जस्ता राष्ट्रघाती सन्धि सम्झौता गरेका ठुला दलहरुले देशको स्वार्थ भन्दा आफ्नो ब्यक्तिगत स्वार्थका लागि बैदेशिक शक्ति केन्द्र सामु घुडा टेकेर एमसीसी सम्झौता पारित गरेकोले त्यसको खारेजीका लागि आन्दोलन गर्र्नु परेको वताए ।
कार्यक्रम सञ्चालन राष्ट्रिय जनमोर्चा बागलुङका सचिव भिमलाल पोखरेलले गरेका थिए । सभा गर्नुपहिले जनमोर्चाले बागलुङ बजारमा नारा जुलुस गरेको थियो ।
