पोखरा, २३ फागुन – पूर्वप्रधानमन्त्री तथा नेकपा एमाले अध्यक्ष केपी शर्मा ओलीले अदालतमा मुद्दा दर्ता गरेर सरकार बन्ने भए ‘डेमोक्रेसी’ आवश्यक नरहेको बताएका छन् ।
सोमबार पोखरामा भएको मानव अधिकार एलाइन्सको पाँचौ राष्ट्रिय महाधिवेशनलाई सम्बोधन गर्दैउनले अहिलेको सरकार निर्माण सामान्य सीमाना विवाद भन्दा पनि मामुली तरिकाले बनेकोसमेत आरोप लगाए ।
‘पार्लियमेन्ट हो सरकार बनाउने थलो, त्यताबाट नसकेर मुद्दा जितेर सरकार ल्याउने भनेपछि डेमोक्रेसी किन चाहियो ? यो त सीमानाको झगडा भन्दा पनि मामुली भयो,’ ओलीले भने ।
ओलीले जनताको बीचमा जान नसकेर परमादेशबाट सरकार गठन भएकोसमेत सुनाए । ‘हाम्रो सरकारमा पात पहेंलिएर झर्दा पनि विरोध गरे’ पूर्वप्रधानमन्त्री ओलीले आफ्नो सरकारको बेला विरोधीले रुखको पात झर्दा पनि विरोध गर्ने गरेको आरोप लगाए ।
‘हामी सरकारमा भयौं भने हाम्रा विरोधीले रुखबाट एउटा ओइलिएको पात झरे पनि यो सरकारको कमजोरीले रुखबाट पातहरु झर्न थाल्याछन्, चैतको महिनामा रुखहरु हेर त उजाड भएका भनेर उधुम मच्छाउँछन्,’ उनले भने ।
अहिलेको सरकार भ्रष्टाचार गर्दै अर्थतन्त्र ध्वस्त हुँदा पनि सबै चुपचाप बनेको ओलीको आरोप थियो । ‘अहिले देशको अर्थतन्त्र यस्तो हुँदा, परराष्ट्र सम्बन्ध बिग्रिँदा चुपचाप छन् । मानिलिऊ केही बिग्रिएकै छैन,’ उनले भने ।
ओलीले नेपाल अन्य देशको तुलनामा केही स्वतन्त्र रहेको सुनाए । नेपालमा पनि नेकपा एमाले मानवअधिकारका अवधारणाप्रति पूर्ण मात्रामा एक कदम अगाडि रहेको उनको दाबी गरे ।
‘हाम्रो पार्टी वैज्ञानिक, न्यायोचित, समाजिक न्याय र समानता, समान हक र अधिकारीको प्रत्याभूति गर्छ । कहीं कसैलाई गरिबी नहोस्, त्रास नरहोस् भन्ने मान्यता राख्छ,’ उनले भने ।
