पोखरा, २४ फागुन – नाबालिका बलात्कारको आरोपमा अनुसन्धानका लागि तनहुँ प्रहरी हिरासतमा रहेका अभिनेता पल शाहलाई थप बयानका लागि मंगलबार दमौलीबाट नलवपुरको गैँडाकोट लगिएको छ । प्रहरीका अनुसार गैँडाकोट प्रहरीमा पनि शाहविरुद्ध उजुरी परेकाले थप अनुसन्धानका लागि त्यहाँ लगिएको हो ।
उनलाई एक-दुई दिन गैँडाकोट प्रहरीचौकीमा राखिनेछ । अनुसन्धानका लागि शाहविरुद्ध पहिलोपटक सात र दोस्रोपटक १२ दिनको म्याद थप भएको छ । शाहको मुद्दा प्रक्रिया भने तनहुँबाट अगाडि बढिरहेको छ । गैडाकोट प्रहरीले बयान लिएपछि मिसिलसँगै उनलाई गैडाकोटबाट तनहुँमा पठाइनेछ ।
नाबालिग गायिकाले एउटा गीतको छायांकनका क्रममा गत वर्ष चैत ७ गते गैँडाकोटको एक होटेलमा शाहले आफूमाथि बलात्कार गरेको भन्दै इलाका प्रहरी कार्यालय गैंडाकोटमा उजुरी दिएकी थिइन् । त्यसअघि उनले जिल्ला प्रहरी कार्यालय तनहुँमा उजुरी दिएकी थिइन् । नाबालिकामाथि बलात्कार गरेको आरोपमा शाहमाथि अनुसन्धान भइरहेको छ ।
