बागलुङ, २४ फागुन – बागलुङ नगरपालिका वडा नम्बर ४ उपल्लाचौरमा गत आइतबार मध्यराती गस्तीमा रहेको प्रहरीले एउटा दृष्य देख्यो । दुईजना बालकहरु मोटरसाइकल डोराई रहेका थिए । स–साना उमेरका बालकहरु मध्यरातमा मोटरसाइकल डोराई रहेको देखेपछि शंका गरेको प्रहरी सोधपुछ थाल्यो ।
बालकहरु प्रश्नको जवाफ दिनको साटो भाग्न खोजे । मध्यरात, डराईरहेका बालकहरु देखेपछि पहरीले उनीहरुको पछाडी लाग्यो र समायो । त्यसपछि भेद खुल्यो ती बालकहरुले डोराईरहेको मोटरसाइकल चोरीको रहेछ ।
ध १ प २२२१ नम्बरको मोटरसाईकल बागलुङ नगरपालिका वडा नं। ४ उपल्लाचौरमा पार्किङ गरी राखेको ठाउँबाट उनीहरुले चोरी गरेको बताए । चोरीको आरोपमा प्रहरीले उनीहरुलाई पक्राउ गरेको छ । उमेर नपुगेकाले उनीहरुको परिचय खुलाईएको छैन् । दुवै बालकविरुद्धमा चोरी मुद्दा दर्ता गरी जिल्ला अदालतबाट म्याद थप भएको प्रहरी निरीक्षक विजय भण्डारीले बताए ।
प्रहरीको नियन्त्रणमा रहेका बालकहरुले दिएको बयानका आधारमा सदरमुकाममा भएका अन्य चोरीका घटनाको खोजी सुरु भएको छ । प्रनि भण्डारीका अनुसार बागलुङ नगरपालिका वडा नम्बर ३ मुल्पानी बस्ने १८ वर्षिय कुनाल बोहोराको निर्देशनमा ती बालकहरुले मोटरसाईकल चोरी गरेका हुन् ।
उनीहरुले बागलुङ नगरपालिका–२ शिबधाराचोकमा सुजन बोहोराले संचालन गरेको मोबाईल पसलमा समेत चोरी गरेको बताएका छन् । मंसिर २९ गते बोहराको मोबाईल पसलमा चोरी भएको थियो । तत्काल खोजी थालेको प्रहरीले त्यसबेला चोरी गर्ने व्यक्ति पक्राउ गर्न सकेको थिएन् । मोटरसाइकल चोरी गर्ने पक्राउ पर्दा मंसिरमा भएको चोरीका घटनाका दोसी समेत पक्राउ परेको भण्डारी बताए ।
उनीहरुले मंसिर २९ गतेराती ढोकाको चापी फोडी पसलभित्र पसी बिभिन्न मोबाईलहरु चोरी गरेको र चोरी गरेको बयान दिएका छन् । चोरी भएका मोबाईलहरुमध्ये केही मोबाइल कुनाल बोहोरालाई दिएको र केही मोबाईलहरु मर्मत केन्द्रमा मर्मत गर्दै गरेको अवस्थामा प्रहरीले फेला पारेको छ ।
पक्राउ परेका कुनाल बोहरा र अरु दुईजना बालकहरुले शिब स्टोर्स, किराना पसल, लक्ष्मी होटल, लालीगुरास चोकमा पार्किङ गरी राखेको पिकअप भ्यान भित्र राखेको कष्मेटिक सामानहरु, लालीगुरास चोक पार्किङ गरी राखेको पिकअप भ्यानभित्र राखेको समानहरुसहित ९ स्थानमा चोरी गरेको बयान दिएका छन् । उनीहरुको बयानका आधारमा चोरी भएका ठाउँहरुको खोजी र प्रमाण जुटाउने काम भैरहेको भण्डारीले बताए ।
