मुस्ताङ, ३० फागुन – आकर्षक दृश्य, जैविक विविधतायुक्त भूगोल रहेको हिमालपारि अवस्थित मुस्ताङमा अनौठो मौसमी विशेषता पाइन्छ । अन्नपूर्ण-धौलागिरि हिमशृंखलाले छेक्ने हुँदा मुस्ताङमा ९ महिना छायावृष्टि हुने र सुक्खा चिसो हावा दक्षिणबाट उत्तरतर्फ बहने गर्छ । तर फागुन, चैत र वैशाख तीन महिना उत्तरबाट दक्षिणतर्फ उल्टो दिशामा हावा चल्ने गर्छ । मुस्ताङमा हावा बिहानभन्दा दिउँसो र साँझ तीव्र भई बहन्छ ।
कालीगण्डकी नदीको निरन्तर कटानले बनेको संसारको सर्वाधिक साँघुरो ‘अन्धगल्छी’ मुस्ताङमा हावा छिर्ने र झर्ने घाटी हो । फागुन-चैत-वैशाखमा मुस्ताङको उत्तरबाट दक्षिण बग्ने हावा बेगले अन्धगल्छीको घाटीबाट छिर्ने चिसो सुक्खा हिमाली हावालाई उत्तरी हावाहुरी भन्ने गरिन्छ ।
‘यो उत्तरी हावाहुरीको सिजन हो । तल गर्मी बढ्न थालेपछि मुस्ताङको चिसो हावा माथिबाट तलतिर लाग्छ । यो बेला अति तीव्र हावाहुरी चल्ने गर्छ,’ अन्नपूर्ण गाउँपालिका-३ दानाका गंगा पुनले भने, ‘उत्तरी हुरीको पहिलो प्रभाव दानामा पर्छ । हामीले बर्सेनि हावाहुरीले आगो फैलाउने, घर, विद्यालयका छाना उडाउनेसमेत कुनै न कुनै दुर्घटना बेहोरेका छौं ।’
