काठमाडौं, १ चैत – नेकपा एमालेले स्थानीय तहको निर्वाचनमा उम्मेदवार सिफारिस र निर्णय गर्ने मापदण्ड तयार गरेको छ । पार्टीको केन्द्रीय सचिवालयको मंगलबार साँझ बसेको बैठकले उम्मदेवार सिफारिसको मापदण्ड पारित गरेको प्रचार विभाग प्रमुख उपमहासचिव पृथ्वीसुब्बा गुरुङले बताए ।
सचिवालयले पारित गरेको मापदण्ड अनुसार एमालेले वडाध्यक्ष र सदस्यहरुको सिफारिस पार्टीको वडा कमिटीले गर्ने र जिल्ला कमिटीले टिकटको निर्णय गर्ने छ । विगतमा जस्तै गाउँपालिका अध्यक्ष र उपाध्यक्ष तथा नगरपालिकाका मेयर र उपमेयरको सिफारिस जिल्ला पार्टी कमिटीले गर्ने र निर्णय प्रदेश कमिटीले गर्ने प्रमुख गुरुङले बताए ।
त्यसैगरी महानगरपालिका र उपमहानगरपालिकाका मेयर तथा उपमेयरको टिकटको सिफारिस जिल्ला र प्रदेश कमिटीले गर्ने र टिकटको निर्णय केन्द्रिय कमिटीले गर्ने छ । ‘कुनै स्थानका उम्मेदवारहरुको बारेमा विवाद भएमा एक तह माथिको कमिटीले त्यस विषयमा निर्णय गर्ने छ’ गुरुङले बताए ।
एमाले स्थानीय तह निर्वाचनका लागि केन्द्रले नै घोषणापत्र तयार पार्ने भएको छ । बुद्धिजीवी परिषद्को प्रस्तावमा नीति अनुसन्धान प्रतिष्ठानको समन्वयमा तयार हुने घोषणा पत्रलाई केन्द्रीय कमिटीले पारित गर्ने प्रमुख गुरुङले बताए । ‘बुधबार त्यस विषयमा कार्यशाला गोष्ठी हुँदैछ,’ गुरुङले भने, ‘केन्द्रको घोषणापत्र हुन्छ र ७ सय ५३ स्थानीय तहको प्रतिबद्धता पत्र जारी गर्छन् ।’
प्रतिबद्धता पत्रमा स्थानीय तहले हालसम्म गरेको काम र आगामी दिनमा गर्ने कामको बारेमा विवरण रहने छ । उम्मेदवार छनोटको मापदण्ड चैत ९ र १० गते हुने केन्द्रीय कमिटीको बैठकले तय गर्ने छ । ‘केन्द्रीय कमिटीको बैठकमा प्रदेशका अध्यक्षहरुले समग्र कामको रिपोर्ट गर्छन्,’ गुरुङले भने, ‘हाम्रो पार्टी र अन्य दलहरुको अवस्थामा कस्तो छ भन्ने विषयमा जिल्लागत रिपोर्टिङ हुनेछ ।’
स्थानीय चुनावकै बारेमा केन्द्रित रहेर सचिवालयको बैठक भएको र चुनावी रणनीति बनाउन एमालेले चैत ७ गते पोलिटव्यूरो, चैत ९ र १० गते केन्द्रीय कमिटी र चैत १३ गते स्थायी कमिटी बैठक बस्ने प्रमुख गुरुङले जानकारी दिए ।
