बागलुङ, २० चैत – नेकपा एमाले बागलुङले स्थानीय निर्वाचनका उम्मेदवार एकैदिन छान्ने भएको छ । जिल्लाका १० वटै पालिका र वडाध्यक्ष पदका उम्मेदवार स्थानीय कमिटी मार्फत एकैदिन छनौट गर्ने एमाले जिल्ला अध्यक्ष हिरावहादुर केसीले वताए ।
सदरमुकाम बागलुङ बजार आईतवार समपन्न एमाले जिल्ला कमिटीको दोस्रोपूर्ण बैठकले चैत २४ गते ८५ वटै वडा कमिटीको बैठक गरी आफ्नो वडामा स्थानीय निर्वाचनका लागि वडाध्यक्ष र सदस्यहरुको सिफारिस गर्ने निर्णय गरेको हो ।
त्यस्तै, चैत २७ गते १० वटै पालिका कमिटीको बैठक गरी प्रमुख र उपप्रमुख सिफारिस गर्न स्थानीय कमिटीलाई निर्देशन गरेको छ ।
आफ्ना वडा र पालिकाका उम्मेदवार सिफारिस गर्दा सकेसम्म सर्वसम्मत रुपमा आवश्यक उम्मेदवार मात्रै सिफारिश गर्न निर्देशन गरेको एमाले जिल्ला सचिव विष्णु भुसालले वताए । सर्वसम्मत हुन नसकेमा बढिमा एक महिलासहित ३ जनाको नाम सिफारिस गर्न पार्टीले भनेको छ ।
एमालेले वडाध्यक्ष र सदस्यको सिफारिश सुरु तहको कमिटी वडामार्फत सिफारिस गर्ने र जिल्ला कमिटीले अन्तिम टुंगो लगाउने विधि बनाएको छ ।
त्यस्तै, पालिका प्रमुख र उपप्रमुखको सिफरिस पालिका कमिटीले. गर्ने र अन्तिम टुंगो प्रदेश कमिटीले लगाउने विधि छ । आवश्यकताका आधारमा केन्द्रिय कमिटीले सवै तहका उम्मेदवारको पुर्नविचार गर्न सक्ने एमाले.केन्द्रिय सदस्य तथा जिल्ला इन्चार्ज गोविन्द नेपालीले वताए ।
स्थानीय निर्वाचनमा जिल्लामा बामपन्थी एकतालाई प्राथमिकतामा राख्दै एमालेले अन्य दलसंग चुनावी एकता गर्नका लागि पार्टीका केन्द्रिय सदस्य गोविन्द नेपालीको संयोजकत्वमा ९ सदस्यीय वार्ता टोली पनि गठन गरेको छ ।
वार्ता टोलीका सदस्यहरुमा केन्द्रिय सदस्य इन्द्रलाल सापकोटा, सुर्य पाठक, सावित्रा राना, प्रदेस सदस्य जनकराज पौडेल, देव कुमार नेपाली, डिल्लीराज गौतम, जिल्ला अध्यक्ष हिरावहादुर केसी र सचिव विष्णु भुसाल रहेका छन् ।
वैठकमा पार्टी पोलिटब्युरो सदस्य लीला वहादुर थापा मगर, मनकुमारी केसी, जिल्ला इन्चार्ज गोविन्द नेपालीले निर्वाचन केन्द्रित निर्देशन दिएका थिए । जिल्ला अध्यक्ष केसीको अध्यक्षतामा भएको वैठकको सञ्चालन सचिव भुसालले र स्वागत उपाध्यक्ष लक्ष्मण पुनले गरेका थिए ।
वैठकमा १० वटै पालिकाका पार्टी अध्यक्षहरुले आआफ्नो पालिकाको रिपोर्टीङ गरेको सहसचिव डम्मर श्रीसले जानकारी दिए ।
