बागलुङ, १४ बैशाख – सत्ता गठबन्धनका विरुद्धमा स्वतन्त्र उमेद्वारी दिएका आफ्ना नेता कार्यकर्तालाई नेपाली कांग्रेस बागलुङले उमेद्वारी फिर्ताका लागि अपिल गरेको छ । बुधबार एक विज्ञप्ती जारी गर्दै कांग्रेसले असन्तुष्टि राखेर स्वतन्त्र र अन्यदलमा प्रवेश गरेर उमेद्वारी दिएका नेता कार्यकर्तालाई उमेद्वारी फिर्ता लिन अपिल गरेको हो ।
कांग्रेसले पार्टीमा योगदान गरेका नेता कार्यकर्ताको क्रमबद्ध मुल्यांकन र न्यायोचित व्यवस्थापन गर्ने विज्ञप्तीमा उल्लेख गरेको छ । पार्टी सभापति जीत बहादुर शेरचनले जारी गरेको बिज्ञप्तीमा भनिएको छ ‘स्वतन्त्र वा अन्य दलको निर्वाचन चिन्हमार्फत उमेद्वारी दिँदा नेपाली कांग्रेसले अबलम्वन गरेको राष्ट्रियता, लोकतन्त्र र समाजबाद प्रतिको हाम्रो निष्ठा वर्तमान राजनीतिक गठबन्धनविरुद्ध जाँदा पार्टीलाई दुरगामी रुपमा क्षति पुग्ने हुन्छ ।’
शेरचनले उमेद्वारी फिर्ता लिएर एक ढिक्का भएर गठबन्धनका उमेद्वारलाई जिताउन लाग्नसमेत आग्रह गरेका छन् ।
विज्ञप्तीमा कांग्रेस सभापति शेरचनले नेकपा एमाले अध्यक्ष केपी शर्मा ओलीको आलोचना गरेका छन् । निर्वाचन संघारमा रहेका बेला उनले लोकतन्त्र मास्न र संविधान मास्न खोज्नेबिरुद्ध गठबन्धन भएको भन्दै गठबन्धनका पक्षमा लाग्न कार्यकर्तालाई आग्रह गरेका हुन् ।
