बागलुङ, ६ जेठ – बागलुङ नगरपालिकाका नवनिर्वाचित प्रमुख, उपप्रुख र वडाअध्यक्ष तथा वडा सदस्यहरुले पद तथा गोपनियताको सपथ लिएका छन् । गत बैशाख ३० गते सम्पन्न स्थानीय तहको निर्वाचनको नतिजाआएसँगै बागलुङ नगरपालिकाका निर्वाचित जनप्रतिनिधिलाई विहिबार सपथ ग्रहण गराईएको हो । उनीहरुलाई निर्वाचित प्रमाणपत्र पनि वितरण गरिएको छ ।
बागलुङ नगरपालिकाका मुख्य निर्वाचन अधिकृत बासुदेव न्यौपानेले नवनिर्वाचित नगरप्रमुख बसन्त कुमार श्रेष्ठलाई सपथ ग्रहण गराएका थिए भने नगर उप–प्रमुख राजु खड्का, सवै वडा अध्यक्ष र वडा सदस्यहरुलाई नगरप्रमुख श्रेष्ठले पद तथा गोपनियताको सपथ ग्रहण गराए । बागलुङ नगरपालिकाका १४ वटै वडामा निर्वाचित जनप्रतिनिधिले एकसाथ सपथ ग्रहण गरेका हुन् ।
सपथ ग्रहण पश्चात बोल्दै नगरप्रमुख श्रेष्ठले अबको पाँच वर्ष जनताको सुख दुःखको सारथी बन्दै सवै नगरबासीप्रति उत्तरदायी भएर काम गर्ने प्रतिवद्धता व्यक्त गरे । उनले नगरपालिकामा निर्वाचित सवै जनप्रतिनिधि अबको नगरपालिका कस्तो बनाउने भन्ने योजना सहित आएको र सवैसंग हातमा हात काँधमा काँध मिलाएर अगाडी बढ्ने बताए ।
श्रेष्ठले निवर्तमान नगरप्रमुख जनकराज पौडेलका पाँच वर्षको अनुभवलाई समेत साथ लिएर अगाडी बढ्ने बताए ।
