म्याग्दी, ८ माघ– सातौँ म्याग्दी महोत्सव, माघे सक्रान्ति मेला एवम् गण्डकी प्रदेशस्तरीय कृषि, औद्योगिक व्यापार मेला १० करोडको कारोबार गर्दै सम्पन्न भएको छ ।
उद्योग वाणिज्य संघको आयोजनामा सदरमुकाम बेनीको खुलामञ्चमा १० दिनसम्म चलेको मेलामा करिब १० करोडको कारोबार भएको उद्योग वाणिज्य संघ म्याग्दीका अध्यक्ष बेलबहादुर कटुवालले जानकारी दिए ।
‘अपेक्षा गरेअनुसार कारोबार भएको छ, महोत्सव सफल बनाउन सहयोग गर्ने सबैप्रति आभारी छौँ’ अध्यक्ष कटुवालले भने । महोत्सवमा प्रदर्शन गरिएका विभिन्न संघसंस्था र जनजातिको झाँकी, भेशभूषा र नृत्यले जिल्लाको कला संस्कृतिलाई जगेर्ना गर्न मद्दत पु¥याएको महोत्सवको सांस्कृतिक विभागले जनाएको छ ।
महोत्सवमा कृषि प्रदर्शनी, कालीगण्डकी नदीमा ¥याफ्टिङ, महिला पुरुष भलिबल, बास्केटबल, लोकदोहोरी, गण्डकी लोकस्टार, रत्यौली, पुख्र्यौली नृत्य, एकल र खुला नृत्य प्रतियोगिता, फोटो प्रदर्शनी लगायतका कार्यक्रम आयोजना गरिएको थियो ।
महोत्सवस्थलमा व्यापारिक र अन्य गरी कूल दुई सय ५८ कक्ष राखिएको थियो । ती व्यापारिक कक्षमा उत्साहजनक कारोबार भएको आयोजकले जनाएको छ । महोत्सवमा १ करोड २४ लाख ८७ हजार आम्दानी र १ करोड १५ लाख ७७ हजार २ सय ११ खर्च भई ९ लाख ९ हजार ७ सय ८९ बचत हुने अध्यक्ष कटुवालले जानकारी दिए ।
