बागलुङ, ८ चैत्र– धवलागिरी बहुमुखी क्याम्पस (डिएमसी) बागलुङमा चैत्र ५ गते स्थगित स्वतन्त्र विद्याथीृ युनियन (स्ववियू) को चुनाव चैत्र १८ गते हुने भएको छ ।
क्याम्पस प्रशासन र विद्यार्थी संगठनहरुको बैठकले चैत्र १८ गते निर्वाचन गर्ने र बिहिवार निर्वाचन कार्यतालिका सार्वजनिक गर्ने निर्णय गरेको क्याम्पस प्रमुख प्रा. डा. रामप्रसाद उपाध्यायले जानकारी दिए । उपाध्यायले ६ वटा विद्यार्थी संगठनको सहमतिमा उक्त निर्णय भएको र ४ विद्यार्थी संगठन बैठकको निर्णय नहुँदै बाहिरिएको जानकारी दिए ।
त्रिभुवन बिश्व बिद्यालयले चैत्र ५ गतेका लागि तोकेको निर्वाचन मितिमा अनेरास्ववियु, अखिल क्रान्तिकारी लगायतका विभिन्न ४ विद्यार्थीले स्ववियु निर्वाचन कार्यालयमा तालबन्दी गरेका कारण स्थगित भएको थियो । उपाध्यायका अनुसार, निर्वाचन सम्बन्धीे निर्णय ६ विद्यार्थी संगठनको उपस्थितिमा भएको हो ।
असन्तुष्ट ४ विद्यार्थी संगठनका मागलाई पनि क्याम्पस प्रशासनले सम्बोधन गरी सबैको सहमतिमा निर्वाचन हुने उपाध्यायको भनाई छ ।
अखिल क्रान्तिकारीका गण्डकी प्रदेश उपाध्यक्ष जिवन शर्माले भने क्याम्पसमा यसअघि अनेरास्ववियु, अखिल क्रान्तिकारी लगायतले उठाएका माग सम्बोधन नभएपछि आफुहरु बैठकबाट बाहिरएको प्रतिक्रिया दिए । उनले आफुहरु बैठकमा नहुँदा भएको निर्णय मान्य नहुने बताएका छन् ।
