बागलुङ, १६ बैशाख– शिकारीको रोजाईमा पर्न नसक्दा ढोरपाटन सिकार आरक्षमा वैधानिक रुपमा अनुमति लिएर बँदेलको सिकार गर्न पाइने भएपनि पछिल्लो पाँच वर्षमा बँदेलको सिकार हुनसकेको छैन ।
ढोरपाटनमा आर्थिक वर्ष २०७३÷७४ पछि बँदेलको सिकार हुन नसकेको ढोरपाटन सिकार आरक्षका प्रमुख संरक्षण अधिकृत वीरेन्द्र कँडेलले बताए । ढोरपाटनमा हरेक वर्ष नाउर, झारल, रतुवा र मृगको सिकार हुँदै आएको छ ।
ढोरपाटनमा गत आर्थिक वर्षदेखि नाउर र झारलको सिकार गरे पनि बोनसको रूपमा बँदेलको सिकार गर्न रोक लगाएर छुट्टै अनुमति लिनुपर्ने व्यवस्था गरिएको हो । यस वर्षको दोस्रो सिजनमा ११ बँदेलको अन्तर्राष्ट्रिय बोलपत्र आह्वान गरिए पनि बँदेलको सिकारका लागि सिकारीले इच्छा नदेखाएको कँडलले बताए ।
‘अघिल्लो याम बोलपत्र स्वीकृत भएपनि बँदेल सिकारका लागि सिकारी आएनन्’, कँडेलले भने, ‘यस वर्ष बोलपत्र स्वीकृत नभएपछि सिकारी यस याममा पनि नआउने निश्चित देखिन्छ ।’ बँदेल सिकार रातीमा उत्तम रहेकाले पनि सिकारीले इच्छा नदेखाएको हुनसक्ने प्रमुख संरक्षण अधिकृत कँडेलको भनाई छ ।
पहिले नाउर र झारलको सिकार गरेवापत बोनसका रूपमा रतुवा र बँदेल एक÷एक वटा सिकार गर्न दिइने गरेपनि अहिले त्यसको व्यवस्था नभएको हिमालयन आउट फिटर्सका सञ्चालक अतुल खड्काले बताए । ‘अहिले बँदेलको सिकारका लागि बोलपत्रमार्फत स्वीकृत हुनुपर्ने भएकाले सिकारीले इच्छा नदेखाएका हुन्’ खड्काले भने ।
सञ्चालक खड्काले नेपालीका लागि सिकार गर्न विभागले सहज वातावरण बनाइदिनुपर्ने बताए । प्रक्रिया नबुझेर पनि नेपाली सिकारीले इच्छा नदेखिएको बताउँदै खड्काले प्रक्रियाबारे विभागले जानकारी दिनुपर्ने बताए ।
