काठमाडौं, १ जेठ– नेपाल चिकित्सक संघ र एशोसिएशन अफ प्राइभेट हेल्थ इन्स्टिच्युसन नेपालले सोमबारदेखि लागू हुनेगरी चिकित्सकको परामर्श सेवा शुल्क बढाएको छ ।
संघका महासचिव डा. सञ्जीव तिवारीले सोमबारदेखि लागू हुने गरी चिकित्सकको परामर्श शुल्क पहिलेको तुलनामा १४ प्रतिशत बढाइएको जानकारी दिए ।
संघले चिकित्सको परामर्श शुल्क दुई वर्षपछि बढाएको हो । स्वास्थ्य तथा जनसंख्या मन्त्रालयका तर्फबाट शुल्क पुनरावलोकन तथा निर्धारण नहुञ्जेल सम्मका लागि बहिरंग सेवा शुल्क शुल्क बढाइएको हो ।
सरोकारवाला निकायको परामर्शका आधारमा शुल्क तोक्न सक्ने अख्तियारीलाई मुख्य आधार बनाई नेपाल राष्ट्र बैंकको मुद्रास्फीति तथा शुल्क परामर्श समितिको सिफारिसका आधारमा शुल्क बढाइएको तिवारीले बताए ।
महासचिव तिवारीका अनुसार चिकित्सकको नयाँ परामर्श शुल्क चार सय २० देखि नौ सय ४० सम्म तोकिएको छ । नयाँ शुल्कअनुसार पाँच वर्षभन्दा कम अनुभव भएका एमबीबीए तथा बीडीएस तहका चिकित्सकको शुल्क ४ सय २० र पाँच वर्षभन्दा बढी अनुभव भएकाको ५ सय १५ परामर्श शुल्क तोकिएको छ ।
यस्तै, पाँच वर्षसम्म अनुभव भएका डिप्लोमा तहका चिकित्सकको ५ सय ९० र त्योभन्दा बढी छ भने ६ सय ७० तथा पाँच वर्षसम्मको अनुभव भएका एमडी, एमएस, एमडीएस तहका चिकित्सकले ७ सय ५० र पाँच वर्षभन्दा बढी अनुभव भएकाले ८ सय रुपैयाँ परामर्श शुल्क लिन पाउने गरी शुल्क तोकिएको छ ।
