पर्वत, ४ मंसिर– जिल्लाको हुवासस्थित बन्द रहेको मिसन अस्पताल पुनः सञ्चालन गर्न तीव्र रूपमा तयारी भएको छ । विगत २२ वर्षदेखि बन्द रहेको यो अस्पताल पुनः सञ्चालनको वातावरण तयार गर्न काठमाडौंस्थित देउराली फाउन्डेसनले काम गर्न थालेको हो ।
स्थानीय सरोकारवाला व्यक्ति, सङ्घ, संस्था र स्थानीय सरकारसँग समेत गरिएको पटक पटकको छलफलपछि देउराली फाउन्डेसनले अस्पताल सञ्चालनका लागि प्रारम्भिक काम सुरु गरिएको हो ।
अस्पतालको जग्गा, भवन र अन्य भौतिक सम्पत्तिको सुरक्षाका लागि अस्पताल परिसरमा तारजाली लगाई गेट निर्माण गर्नुपर्ने ठहर गरेसँगै परिसरमा तारजाली लगाई गेट हाल्ने र सेफ्टी ट्यांकी बनाइएको फाउन्डेसनका अध्यक्ष भीम घिमिरेले बताए ।
दोस्रो चरणअन्तर्गत भवनहरूको मर्मत, रंगरोगन, विद्युतीकरण र प्लम्बिङ सम्बन्धी काम पनि सुरु गर्न लागिएको घिमिरेले बताए । संस्थाका अध्यक्ष माधव मरासिनीले बन्द रहेको अस्पताल पुनः सञ्चालनको प्रारम्भिक चरणमा जोडिएर परोपकारी काम गर्न पाउँदा खुसी लागेको प्रतिक्रिया दिए ।
