बागलुङ, ९ मंसिर– बागलुङको कुँडुलेस्थित रंगवेंकटेश्वर मुक्तीनारायण मन्दिरमा धार्मिक मेला तथा सामुहिक महाभोग सम्पन्न भएको छ ।
बर्षभरको खेती भित्राइसकेको र नयाँ खेती उपभोगका लागि धार्मिक बिधि अनुसार पूजा गरेर महाभोग लगाइएको बताइएको छ । कात्तिक शुक्ल एकादशीको दिन चर्तुमास पूर्ण भएको र त्यसको भोलीपल्ट नयाँ अन्न खाने चलनलाई सामुहिक रुपमा मनाइएको हो ।
उक्त अबसरमा सयौं स्थानीय उपस्थित भएर आरती र गोबर्धन पर्वतको पूजा गरेका थिए । चर्तुमासको सामुहिक भोगका लागि ८४ व्याञ्जन तयार पारिएको थियो । धार्मिक रुपमा पूजा आरतीपछि चढाइएको ८४ प्रकारको प्रसाद भोग लगाइएको हो । यो कार्यले समुदायमा सामाजिक सेवाको भावना बनेको मन्दिर व्यवस्थापन समितिका अध्यक्ष ऋषि प्रपन्नाचार्यले बताए ।
धार्मिक रुपमा बर्षभरी पूजाआजा गर्न नसकेका, विधि पु¥याउन नसकेकाहरुलाई पनि प्रसाद भोग गरेपछि धर्म मिल्ने उनले बताए । गोर्बधनको पूजा गरेर सामुहिक भोग लगाएपछि बर्षभरी समुदायमा सहकाल आउने जनविश्वास रहेको स्थानीयले बताए ।
