बागलुङ १० मंसिर– सिर्जनशील पत्रकारिता पुरस्कारबाट पर्वतका पत्रकार लक्ष्मीप्रसाद सापकोटा पुरस्कृत भएका छन् । आदर्श सञ्चार सहकारी संस्थाका सह–सम्पादक सिर्जना पन्त र पत्रकार सन्तोष क्षत्रीले २०७१ सालमा स्थापना गरेको सिर्जनशील पत्रकारिता पुरस्कार नगद १० हजारसहित सापकोटालाई पुरस्कृत गरिएको हो ।
सहकारीको १७ औं वार्षिक साधारणसभाका अवसरमा सिापकोटालाई पुरस्कार प्रदान गरिएको हो । डेढ दशकदेखि पर्वतबाट पत्रकारितामा सक्रिय सापकोटाले रासससँगै अन्य राष्ट्रिय र स्थानीय सञ्चार माध्यममा काम गर्दै आएका छन् ।
समाजमा विद्यमान भड्कीलो विवाहविरुद्ध पत्रकारद्वय पन्त र क्षेत्रीले प्रगतिशील विवाह गरेर समाजमा सकारात्मक सन्देश प्रवाह गर्दै आफ्नो विवाह खर्च कटाएर १ लाखको सहकारीमा अक्षय कोष स्थापना गरेका छन् । उक्त कोषको ब्याजबाट आउने रकमबाट हरेक वर्ष क्रियाशील पत्रकारलाई पुरस्कृत गरिँदै आइएको छ ।
