बागलुङ, ११ मंसिर– ग्रेस इन्टरनेशनल बागलुङले आइतबार शैक्षिक मेला तथा ‘एड्मिसन डे’ सम्पन्न गरेको छ । अष्ट्रेलिया, क्यानडा, बेलायत, न्युजिल्याण्ड, अमेरिका, जापान र दक्षिण कोरियामा अध्ययन गर्न जाने बिद्यार्थीलाई लक्षित गरेर बिज्ञ तथा जानकारहरुसँगको भेटघाट गर्न मेला आयोजना गरेको हो ।
बैदेशिक शिक्षा सम्बन्धी ज्ञान अभावमा पढ्न जाने बिद्यार्थी अलपत्र नपरुन भनेर यस्तो कार्यक्रम आयोजना गरिएको हो । पछिल्लो समय ती देशमा अध्ययन गर्न जाने बिद्यार्थीको संख्या बढेको छ । अध्ययन गर्न जाने बिद्यार्थीले वास्तविकता बुझ्न नसकेमा महंगोमा पर्ने, कतिपयले बिद्यार्थीलाई अनावस्यक झन्झट र धेरै खर्च गराइदिने भएकोले ग्रेस इन्टरनेशनलले आवस्यक परामर्श सहितको मेला आयोजना गरेको संस्थाका प्रमुख ओमकार पौडेलले जानकारी दिए ।
सम्बन्धित देशका क्याम्पस तथा विश्वविद्यालयका र ग्रेस इन्टरनेशनलको केन्द्रीय कार्यालयका प्रतिनिधि आएर बिद्यार्थीलाई अध्ययनको क्रममा आउन सक्ने समस्याबारे अन्तरक्रिया गरेका थिए । उनीहरुले सहज रुपमा अध्ययन गर्न जाने र भोलीका दिनमा काम गर्न सकिने क्षेत्र, रोजगारीका अबसर बारेमा जानकारी गराइएको हो ।
झण्डै ३ सय बिद्यार्थीका लागि आबस्यक सुझाव र जानकारी समेत दिइएको बताइएको छ । ग्रेस इन्टरनेशनलले पछिल्लो १७ बर्षमा देशभरबाट झण्डै ३ हजार भन्दा धेरै बिद्यार्थीलाई बिदेशमा अध्ययन गर्न पठाएको छ । त्यसपछि फर्केका बिद्यार्थीले नेपालमा पनि राम्रो आयआर्जनको काम गरेका तथा व्यवसाय गरेको पौडेलले जानकारी दिए । कक्षा १२ वा स्नातक उत्तिर्ण बिद्यार्थीहरुले ती देशमा उच्च शिक्षा अध्ययन गर्न जाने गरेका छन् ।
