बागलुङ, १५ मंसिर– कला संस्कृतिको संरक्षण र ब्यापार पद्र्धनका लागि बागलुङ उद्योग वाणिज्य संघले आगामी पुसको दोस्रो हप्तामा बागलुङ महोत्सव २०८० आयोजना गर्ने भएको छ ।
धौलागिरी बहुमुखी क्याम्पस परिसरमा पुस ११ देखि २१ गतेसम्म संचालन हुनेगरी बागलुङ महोत्सव आयोजना गरिएको संघका महासचिव ऋषिराम गौतमले जानकारी दिए । महोत्सवलाई गण्डकी प्रदेशस्तरीय पर्यटन, कृषि तथा औद्योगिक व्यापार मेलाको रुपमा आयोजना गर्न लागिएको गौतमले बताए ।
‘पर्यटन, कृषि, कला संस्कृति, उद्योग र व्यापार–समुन्नत बागलुङ निर्माणको आधार’ भन्ने मूल नाराको साथ महोत्सव आयोजना गरिएको हो । महोत्सवले बागलुङलाई व्यवसायिक गन्तव्य बनाउन र समग्र धौलागिरी क्षेत्रको पर्यटन प्रद्र्धन गर्न मद्दत पुग्ने विश्वास गरिएको संघका अध्यक्ष नरेश कँडेलले बताए ।
महोत्सवमा १ सय २० भन्दा बढी स्टलमार्फत मेलामा राष्ट्रिय र स्थानीय वस्तु तथा सेवाको प्रदर्शनी गरिने छ । अंग्रेजी नयाँ वर्षको अवसर परेकोले महोत्सवमा उल्लेखनीय जनसहभागीता रहने आयोजकले आशा गरेका छन् ।
