ढोरपाटन शिकार आरक्ष क्षेत्रमा हिमपात

बागलुङ, १८ मंसिर– जिल्लाको ढोरपाटन शिकार आरक्ष क्षेत्रमा यो बर्षकै पहिलो हिमपात भएको छ । मौसम बद्लीसँगै सोमबार बिहानैदेखि हिमपात भएको हो ।
सोमबार बिहानदेखि हिमपात भइरहेको ढोरपाटन शिकार आरक्ष कार्यालयका प्रमुख बिरेन्द्र कँडेलले जानकारी दिए । ‘यस वर्ष पहिलो पटक ढोरपाटनमा हिमपात भएको हो,’ कँडेलले धने, ‘हिमपातले ढोरपाटन उपत्यका सेताम्य भएको छ । चिसो धेरै बढेको कारण जनजीवन कष्टकर भएको छ ।’
हिमपातका कारण ढोरपाटनको तापक्रम माईनसमा झरेको छ । उनले हिमपातपछि ढोरपाटन उपत्यकाको वातावरण रमाइलो र आकर्षक भएको बताए । हिमपातले गर्दा घोडा खच्चड तथा बस्तुभाउलाई घाँस दाना हाल्नसमेत गाह्रो भएको स्थानीय कूलबहादुर विकले बताए । हिमपातपछि ढोरपाटन उपत्यकाको वातावरण रमाइलो र आकर्षक भएको छ ।
बागलुङ र रुकुम पूर्वको सिमानामा पर्ने पातीहाल्नेमा हिमपात भएको छ ।