बागलुङ, ३ पुस– बागलुङ कालीका भगवती गुठी व्यवस्थापन समितिले मंसिर महिनाको आय–व्यय सार्वजनिक गरेको छ । गुठी व्यवस्थापन समितिका अध्यक्ष कुमार खड्काका अनुसार मंसिर महिनामा ३६ लाख ६६ हजार रुपैयाँ आम्दानी भएको हो ।
मंसिर महिनामा १४ लाख ५१ हजार खर्च गरेर २२ लाख १५ हजार रुपैयाँ बचत भएको गुठीले जनाएको छ । मंसिरमा कर्मचारी तलबका लागि ३ लाख ८ हजार, अतिथि सत्कारमा ७९ हजार, पूर्वाधारमा ५ लाख १६ हजार, फर्निचर खरिदमा १ लाख ७१ हजार रुपैयाँ खर्चेको खड्काले जानकारी दिए ।
त्यस्तै, कुल आम्दानीतर्फ भेटी मात्रै १९ लाख ३१ हजार संकलन भएको छ भने चालम बिक्रीबाट ११ हजार ४ सय, बोकाबाट १ लाख ३८ हजार, कुखुराबाट ९ हजार ४ सय, राँगाबाट ८ हजार, सटर भाडाको ७ लाख ३४ हजार र आर्थिक सहयोगबाट १ लाख ८ हजार रुपैयाँ आम्दानी भएको छ ।
गुठीले ब्रतबन्ध लगायतका कार्यक्रमबाट पनि आम्दानी गर्दै आएको छ । गत कात्तिक महिनामा भने गुठीले ४७ लाख बराबरको आम्दानी गरेको थियो । कर्मचारी र कामदार बढी राख्नुपर्दा कात्तिकमा खर्च पनि बढी भएको गुठीको भनाई छ ।
गुठीले भजन सहितका क्रियाकलापका लागि सत्तल निर्माण गरेको छ भने भक्तपुरका इटा प्रयोग गरेर पुरातात्विक महत्वका भवनहरु निर्माण गरेको छ । पर्यटकीय गन्तव्यको रुपमा विकास भैरहेकोले कालीका मन्दिरमा आउने भक्तजन बढेका छन् ।
