बागलुङ, २० पुस– भुगोलका हिसाबले चार पालिकाको संगममा पर्ने प्राथमिक स्वास्थ्य केन्द्र बुर्तिबाङमा सधैं बिरामीको चाप हुन्छ । कहिले तत्कालै शल्यक्रिया गर्नुपर्ने त कहिले तत्कालै रगत आवश्यक पर्ने बिरामी स्वास्थ्य केन्द्रमा टुट्दैनन् ।
फराकिलो भवनमा सिमित जनशक्ति भएपनि स्वास्थ्य केन्द्रले दिनदिनै सयौं बिरामीको उपचार गर्छ । तीन तहका सरकारले पूर्वाधार उपकरण र प्रबिधि तयार गर्न धेरै प्रयास गरेका छन् । सरकारी प्रयासहरुले धेरै समस्याको समाधान त भएका छन्, तर स–साना केही पूर्वाधारले भने स्वास्थ्य केन्द्रको सेवा प्रवाहमा समस्या आउने गरेको छ । स्वास्थ्य केन्द्रमा आकस्मीक रुपमा हुने रक्तदानका लागि रक्तदान कुर्सीको समस्या लामो समयदेखि थियो । स्वास्थ्य केन्द्र प्रमुख चिकित्सक रचना सुवेदीका अनुसार साढे एक लाख पर्ने कुर्सी किन्न केन्द्रसँग स्रोत थिएन् ।
‘आकस्मिक रुपमा व्लड चाहियो भने हामीले व्लडदान गर्ने व्यक्ति र बिरामीलाई एकै प्रकृतिको वेडमा राखेर रगत लिने गरेका थियौं’ सुवेदीले भनिन् ‘यो जोखिमपूर्ण र असजिलो काम थियो, व्लड डोनेसन कुर्सीको अभावमा हामीले त्यसो गरेका थियौं ।’ अब भने स्वास्थ्य केन्द्रमा रक्तदान गर्ने व्यक्तिले आरामले सुतेर रक्तदान गर्न पाउने छन् । दाताको सहयोगमा स्वास्थ्य केन्द्रमा रक्तदान कुर्सी भित्राईएको छ ।
फेयर मेड फाउण्डेसन र बिवाईसी बागलुङको सहयोगमा स्वास्थ्य केन्द्रले कुर्सी पाएको हो । कुर्सी हस्तान्तरण गर्दै जिल्ला समन्वय समिति बागलुङका प्रमुख अमर थापाले पूर्वाधार र उपकरणको उपयोगमा जोड दिए ।
एक लाख ५० हजारभन्दा धेरै मुल्य पर्ने कुर्सी काठमाण्डौंमा खरिद गरिएको हो । यसअघि पनि दाताहरुले स्वास्थ्य केन्द्रको प्रयोगशाला लगायतका लागि बिभिन्न सामग्री सहयोग गर्दै आएका थिए ।
