बागलुङ, २३ माघ– प्रथम गुराँस कप अन्तर विद्यालय स्तरिय फुटसल प्रतियोगिता हुने भएको छ । बागलुङ नगरपालिका–३ स्थित गुराँस विद्या सदन र गुराँस चाइल्ड क्लबको आयोजनामा माघ २४ र २५ गते प्रथम गुराँस कप अन्तर विद्यालय फुटसल प्रतियोगिता हुने भएको हो ।
गुराँस विद्या सदनको छैंटो वार्षिकोत्सवको सन्दर्भ पारेर कक्षा ८ सम्मका विद्यार्थीहरुबीच प्रतियोगिता संचालन गर्न लागिएको विद्यालयका प्रिन्सिपल निशान खड्काले पत्रकार सम्मेलनमार्फत जानकारी दिए ।
आयोजक गुराँस विद्या सदनको तीन टिमसहित १९ विद्यालयले प्रतियोगितामा सहभागिता जनाउने दिदै प्रिन्सिपल खड्काले प्रतियोगितामा विजेता समुहलाई १५ हजार ५ सय ५५ रुपैयाँसहित ट्रफी, मेडल र प्रमाणपत्र तथा उपविजेता बन्ने समुहलाई ७ हजार ७ सय ७७ रुपैयाँसहित ट्रफी मेडल र प्रमाणपत्र प्रदान गरिने बताए ।
प्रतियोगितामा सेमिफाइनल पुग्ने समुहलाई पनि ट्रफी र प्रमाण पत्र प्रदान गरिने जानकारी दिदै शिक्षक रामु जिसीले उत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई पनि पुरस्कृत गरिने बताए । पत्रकार महासंघ बागलुङका सचिव विजय रानाले बालबालिकाको प्रतिभा प्रष्फुटनका लागि खेलले महत्वपूर्ण सहयोग पुग्ने बताएका थिए ।
