मनाङ / भारी हिमपातपछि मनाङको जनजीवन प्रभावित बनेको छ। हिउँमा फसेका पर्यटकको उद्धारमा बिहानदेखि सुरक्षा निकाय प्रयासरत छन् तर सवारी अभावमा उनीहरूलाई सकस भएको छ।
प्रमुख जिल्ला अधिकारी नवराज पौड्यालले हिउँमा फसेका पर्यटकको उद्धारमा सवारी अभाव भएको जानकारी दिए। ‘फसेका पर्यटकको उद्धार गरिरहेका छौं। हिउँमा सवारी पनि फसेकाले सकस भएको छ। अन्य सवारी अभाव छ,’ उनले भने।
तिलिचो आधार शिविरमा अलपत्र पर्यटकलाई उद्धार गरिएको र खाङ्सारमा अन्य व्यवस्थापन गरिएको उनले बताए। पच्चीस किलोमिटर सडकबाट हिउँ फालेर आवागमन सहज बनाइएको पनि उनले जानकारी दिए।
केही पर्यटकलाई घरबास र केहीलाई निजी घरमा व्यवस्थापन गरिएको स्थानीय पर्यटन व्यवसायीले बताएका छन्। उनीहरूका अनुसार सबै विदेशी पर्यटक सुरक्षित छन्।
