काठमाडौं, १० मंसिर– नेकपा (एमाले)ले समानुपातिकतर्फ अग्रता कायमै राखेको छ। सुरूदेखि नै पहिलो स्थानमा रहेको एमालेले शनिबार दिउँसो २० लाख मत कटाएको छ । ७४ लाख ३४ हजार ८ सय २४ मत गणना हुँदा एमालेले २० लाख ३२ हजार २ सय ३३ ल्याएको हो । यो कुल सदर मतको २७ दशमलब ३७ प्रतिशत हो ।
दोस्रो स्थानमा रहेको कांग्रेसले १९ लाख ६३ हजार ५ सय ८५ मत पाएको छ । यो गणना भएको सदर मतको २६ दशमलब ४१ प्रतिशत हो । तेस्रो स्थानमा रहेको माओवादी केन्द्रले ८ लाख ७३ हजार ९ सय ६ मत अर्थात् ११ दशमलब ७५ प्रतिशत मत ल्याएको छ ।
चौथो स्थानमा रहेको राष्ट्रिय स्वतन्त्र पार्टीले ८ लाख ४२ हजार ७ सय २१ मत अर्थात् ११ दशमलब ३३ प्रतिशत मत पाएको छ । पाँचौं स्थानमा रहेको राप्रपाले ४ लाख ४७ हजार ७ सय ९६ अर्थात् ६ प्रतिशत मत ल्याएको छ भने एकीकृत समाजवादी पनि राष्ट्रिय दलतर्फ उन्मुख छ । उसले १ लाख ८७ हजार ५ सय २९ मत ल्याएको छ । समाजवादीले २ दशमलब ५२ प्रतिशत मत ल्याएको हो ।
