बागलुङ, १२ माघ– जिल्लाको गलकोट नगरपालिका वडा नं. ५ हरिचौरस्थित प्राथमिक स्वास्थ्य केन्द्रलाई स्तरोन्नति गरेर नगर अस्पताल बनाइने भएको छ । मापदण्ड पूरा गर्न नगरपालिकाले दरबन्दी पूरा गर्ने, आवश्यक पूर्वाधार र सामग्रीको जोहो गर्ने तयारी गरेको छ ।
जग्गा अपुग भएकाले दुई रोपनी थप गर्न लागेको वडा नं. ५ का अध्यक्ष पवन हमालले बताइ । ‘पन्ध्र शैयाको अस्पताल बनाउने तयारीपछि संरचनात्मक सुधार गर्नुपर्ने आवश्यकता छ । कम्तीमा दुई चिकित्सकको व्यवस्थापन गरिएको छ । हाल दरबन्दीमा एक चिकित्सक मात्र छन्’, हमालले भने ।
गलकोटको हरिचौर र वडा नं. ६ बाहेक ताराखोला गाउँपालिकालाई पायक पर्ने प्राथमिक स्वास्थ्य केन्द्र अस्पतालमा स्तरोन्नति हुँदा नगरपालिकाका सबै सेवाग्राहीले सेवा लिनसक्ने छन् । नगरपालिकाले स्वास्थ्य मन्त्रालयलाई ‘ओएनएम’ सर्भे गरिदिन आग्रह गरेको छ ।
नगर अस्पतालमा नियमित उपचारका साथै शल्यक्रिया सेवा पनि सञ्चालनमा छ । अस्पतालमा दैनिक ५० देखि ६० बिरामी उपचारका लागि आउने गर्छन् । ‘तीन वर्षअघि निर्णय भएपनि पूर्वाधार र जनशक्ति व्यवस्थापन गरेर बल्ल अस्पताल बनाउन लागेका छौँ’, नगरप्रमुख भरत शर्मा गैरेले भने ।
नगरपालिकाले आन्तरिक स्रोतबाट जनशक्तिको व्यवस्थापन गरेको हो । अस्पताल बन्नका लागि १५ शैया, एक विशेषज्ञसहित तीन चिकित्सक लगायत स्वास्थ्यकर्मीको दरबन्दी चाहिन्छ । जनस्वास्थ्य निरीक्षक देवप्रकास घिमिरे फेयरमेड फाउण्डेसन र ग्रामीण स्वास्थ्य सुधार परियोजनाले उपकरणका लागि सहयोग गरेको बताए ।
