पोखरा, ५ पुस – विद्यार्थीसँग विभिन्न बहानामा पोखरास्थित मणिपाल अस्पतालले बढी शुल्क असुलेको भन्दै नेकपा एमाले निकट अनेरास्ववियु विगत दुई हप्तादेखि निरन्तर आन्दोलनमा छ । संगठनले सोमबारसमेत गरेको शुल्क फिर्ता नलिएको भन्दै मणिपाल शिक्षण अस्पताल परिसरमा नाराबाजी गरेको थियो ।
तर, क्याम्पस प्रशासनले आफूहरुको माग पूरा गर्नुको साटो विभिन्न बहानामा टार्दै आएको अनेरास्ववियुको आरोप छ । चिकित्सा शिक्षा आयोगले दुई वर्षअघि चिकित्सा संकायका लागि निश्चित शुल्क तोकेको भए पनि मणिपालले विभिन्न बहानामा छ लाख रुपैयाँभन्दा बढी असुलेको विद्यार्थीको आरोप छ ।
वृद्धि गरेको शुल्क फिर्ता नलिएसम्म आन्दोलन नरोकिने अनेरास्ववियुका गण्डकी प्रदेश अध्यक्ष प्रकाश पौडेलले वताए ।
