म्याग्दी, १९ चैत्र– जिल्लाको बेनी नगरपालिका खबरा का एक सय ६० घरधुरी र बगरफाँटका १८ घरधुरीका किसानले केरा खेतीबाट वार्षिक डेढ करोड आम्दानी गर्न सफल भएका छन् ।
खबराका किसानले केरा खेतीबाट वार्षिक एक करोड र बगरफाँटका किसानले वार्षिक ५० लाखको हाराहारीमा केरा बिक्री गर्दै आएका छन् । व्यापारीहरु केरा बगानमै आएर खरिद गर्ने गरेको खबराका किसान शोभत शर्मा सापकोटाले बताए ।
खेतबारी, पाखा, कान्ला र खोल्सा सबैतिर केरा खेतीले छपक्कै ढाकेको किसान चन्द्रबहादुर कार्कीले बताए । यस क्षेत्रमा केरा खेतीको सुरुवात २४ वर्षअघि मानबहादुर थापा र चन्द्रबहादुर कार्कीले गर्नुभएको स्थानीय बताउँछन् । थापा र कार्कीले सुरु गरेको केरा खेती १२ वर्षदेखि व्यवसायिक बन्दै गएको स्थानीयको भनाइ छ ।
अन्य खेतीभन्दा केरा खेतीबाट राम्रो आम्दानी हुने भएपछि खबरा र बगरफाँटका किसान आकर्षित भएका छन् । खबराका प्रत्येक घरधुरीले हजारी जातको केराको खेती गरेका छन् । परम्परागत खाद्यबालीको विकल्पका रूपमा खेतबारीमा व्यावसायिक केरा खेती गर्न थालेपछि खबरावासीको आर्थिक अवस्थामा निकै सुधार आएको कार्कीको भनाई छ ।
थोरै लगानीमा छिटो आम्दानी गर्न सकिने, बजार नजिक र अन्य बालीको तुलनामा सजिलो भएकाले केरा खेतीतर्फ किसान आकर्षित भएका हुन् । बिरुवा रोपेको दुई वर्षमा पसाउन थाल्ने र पसाएको पाँच महिनामा बिक्रीका लागि केरा तयार हुने कार्कीले बताए ।
