बागलुङ, २५ चैत्र– जिल्लाको ढोरपाटन नगरपालिकाले पूर्ण खोपबाट वञ्चित र कुपोषित बालबालिकाको खोजी गर्न स्वास्थ्य आमा समूहमार्फत अभियान थालेको छ ।
स्वास्थ्य आमा समूह गठन गरी बालबालिकालाई स्वास्थ्य सेवाको पहुँचमा ल्याउन थालिएको हो । जनचेतना तथा अशिक्षाका कारण बालबालिका कुपोषित हुने र पूर्ण खोप नलगाएको पाइएपछि अभियान थालिएको स्वास्थ्य शाखा प्रमुख केशव थापाले जानकारी दिए ।
स्वास्थ्य शाखाले स्वास्थ्यकर्मीसहित गाउँमै पुगेर स्वास्थ्य आमा समूहलाई स्वास्थ्य शिक्षा, पूर्ण खोपबारे जानकारी दिने र कुपोषित बच्चाको खोजी कार्य थालेको थापाको भनाई छ । थापाका अनुसार, दुर्गममा धेरै बालबालिका कुपोषित र पूर्ण खोप नलगाएका भेटिएका छन् ।
ढोरपाटनमा गतवर्ष २९ जना र यो वर्ष १५ जना बालबालिकामा कुपोषणको समस्या देखिएको थियो । यसवर्ष वडा नम्बर २, ३, ४ र ६ मा कुपोषित र पूर्ण खोप नलगाएका बालबालिका भेट्यौँ, अझै पाँच वटा वडामा पुग्न बाँकी छ’ थापाले भने ।
बालबालिका कुपोषित हुनबाट रोक्न तथा पूर्ण खोप लगाउन टोल टोलमा स्वास्थ्य आमा समूह गठन गर्ने र उनीहरुलाई खोप लगाउने समय, कुपोषित बच्चामा देखिने लक्षण र समयमै स्वास्थ्य संस्थामा लैजानुपर्ने विषयमा प्रशिक्षित गरिएको छ ।
‘खोजी अभियानबाट धेरै कुपोषित बालबालिका भेटिने आँकलन गरेका छौँ’ थापाले भने, ‘अभिभावक शिक्षित नभएसम्म कूपोषण र पुर्ण खोप अभियान सफल बनाउन सकिदैन ।’
