बागलुङ, ७ बैशाख– तरलता अभाव देखाउँदै एक साताका लागि कारोबार बन्द गरेपछि बचतकर्ताले रकम डुब्ने आशंकामा इमेज बचत तथा ऋण सहकारी संस्था लि. बागलुङको कार्यालय घेरेका छन् ।
संचालक समितिको बैठक बसेर बैशाख ६ गतेदेखि एक साताका लागि कारोबार बन्द गरेपछि बचत डुब्ने आशंकामा आक्रोसित बचतकर्ताले हल्लनचोकस्थित कर्मा कम्प्लेक्समा रहेको सहकारीको कार्यालय घेराउ गरेका हुन् ।
बचतकर्ताहरुले सहकारीका कार्यालय घेराउ गरेपछि त्यहाँ अहिले प्रहरीले सुरक्षा दिईरहेको छ ।
सहकारीका सञ्चालक चित्रबहादुर भण्डारीले सहकारी समस्यामा नरहेकाले बचतकर्ता सबैको पैसा फिर्ता हुने बताए । ‘केही समयपछि बचत फिर्ता हुन्छ, एकैपटक धेरै फिर्ता हुँदा समस्या भएको हो’ भण्डारीले भने ।
आर्थिक वर्ष २०७८÷०७९ मा ४५ लाख ६० हजार ७ सय ६९ रुपैयाँ खुद मुनाफा गरेको सहकारीको १ अर्ब १४ करोड ५८ लाख ६२ हजार ३ सय ५३ रुपैयाँको कुल सम्पत्ती रहेको छ ।
८ सय २० जना सेयर सदस्य रहेको सहकारीको ३ करोड ३३ लाख ४१ हजार दुई सय सेयर पूँजी रहेको छ । संस्थाले ९५ करोड २४ लाख ४० हजार ८ सय ४८ रुपैयाँको बचत संकलन गरेको जनाएको छ । संस्थाले हाल ७१ करोडभन्दा बढी ऋण लगानी गरिरहेको जनाईएको छ ।
