बागलुङ, ११ पुस – धौलागिरीका तीन जिल्लाका ५ स्थानीय सरकार र लुम्बिनी गार्डेन फाउण्डेशन स्पेनविच स्थानीय तहको विकास र समृद्धिमा सहयोग गर्ने समझदारी भएको छ ।
बेनी नगरपालिका म्याग्दी, बागलुङ नगरपालिका बागलुङ र पवर्तका कुस्मा नगरपालिका, जलजला गाउँपालिका र मोदी गाउँपालिका र फाउण्डेसनबीच संस्थागत सम्बन्ध कायम गदैै सहकार्य÷समझदारी पत्रमा शुक्रवार हस्ताक्षर गरिएको छ ।
राष्ट्रियसभाका अध्यक्ष गणेश तिमिल्सिना र संघिय सांसद सूर्य पाठक र मनकुमारी केसीको उपस्थितिमा फाउण्डेशनका संस्थापक उपाध्यक्ष गोविन्दप्रसाद सुबेदीले बेनी नगरपालिकाका प्रमुख हरिकुमार श्रेष्ठ, बागलुङ नगरपालिकाका प्रमुख जनकराज पौडेल, कुश्मा नगरपालिकाका प्रमुख रामचन्द्र जोशी, मोदी गाउँपालिकाका अध्यक्ष प्रेम शर्मा पौडेल र जलजला गाउँपालिकाका अध्यक्ष यमबहादुर मल्लबीच भगिनी सम्बन्ध स्थापनाका लागि सहमति पत्रमा हस्ताक्षर गरिएको हो ।
राष्ट्रियसभाका अध्यक्ष तिमिल्सिनाले स्पेन र नेपालको सम्बन्ध प्रगाढ बनाउन फाउण्डेशनले खेलेको भूमिकाको उच्च प्रशंसा गर्दै धौलागिरिको समग्र विकासमा स्पेनबाट सहयोगको आवश्यकता रहेको बताए । उनले भगिनी समबन्धमा जोडिएका विषयलाई दुवै पक्षले कार्यान्वयनमा जोड दिनुपर्ने वताए ।
सो अवसरमा बागलुङ नगरप्रमुख जनकराज पौडेलले धौलागिरीभित्रका पाँच स्थानीय तहले प्रतिवद्धता अनुसार काम गर्ने वताउदै यहाँको विकास पर्यटन र कृषिमा स्पेनको मोडेल फलदायी हुने वताए ।
