खुला भलिबलमा जैमिनीको शुरुवाती जित

बागलुङ, १५ पुस– बागलुङ उद्योग बाणिज्य संघद्वारा आयोजित सातौं बागलुङ महोत्सवमा आइतबार खुला पुरुष भलिबल प्रतियोगिता शुरु भएको छ । शुरुवाती खेल यहाँको जैमिनी नगरपालिकाले जितेको छ ।
महोत्सवमा जिल्लाको स्थानीय पालिका स्तरीय भलिबल प्रतियोगितामा आयोजना गरिएको छ । आइतवारको पहिलो खेल जैमिनी नगरपालिकाले ताराखोला गाउँपालिकालाई सोझो दुइ सेटमा जित हात पारेको हो ।
जैमिनीले २५–१२ र २५–२२ को सोझो सेटमा ताराखोलालाई हराएको हो । त्यसअघि यहाँको धौलागिरि बहुमुखी क्यामपस र तित्याङ खेलकुद समितिबीच मैत्रीपूर्ण भलिबल खेल पनि भएको थियो । खेलका बाँकी सबै इमेन्ट सोमबारदेखि मात्रै शुरु हुनेछन् ।
प्रतियोगितामा प्रथम हुने टिमलाई ५५ हजार नगद पुरस्कारको समेत व्यवस्था छ । महोत्सवमा राष्ट्रिय कलाकारहरुको प्रस्तुती, स्थानीय, घरेलु तथा लघु उद्योगका उत्पादनको प्रर्दशनी राखिएको छ । स्थानीय किसानले उत्पादन गरेका कृषिजन्य बस्तुको बजारीकरण समेत गर्न महोत्सव आयोजना भएको हो ।