बागलुङ, १५ फागुन– नेपाल मगर संघ जिल्ला समन्वय समितिले आयोजना गरेको तेस्रो लखनकप भलिबलको उपाधि नरेठाँटी खेलकुट टिम (एनबिए) गलकोटले जितेको छ ।
मगर एकता दिवशको अबसर पारेर चार दिनदेखि जारी खेलमा एनबिएले रोयल बिजी गेष्ठ हाउस काठमाण्डौंलाई सोझो सेटमा पराजित गरेको हो । एनबिएले २५–२०, २५–१७ र २५–१७ को सेटमा रोयल बिजीलाई स्तब्ध बनायो । पहिलो सेटमा सानो स्कोरको अन्तरमा जित्न सफल भएपछि एनबिएका खेलाडी उत्साही थिए । त्यसको प्रत्यक्ष असर रोयल बिजीलाई परेको हो ।
यसअघि एनबिएले तंग्राम भलिबल टिमलाई २–० को सोझो सेटमा जितेर फाइनल यात्रा तय गरेको थियो । रोयल बिजीले भने रुस्दी युवा क्लबलार्ई २५–२०, २५–११ र २५–२३ को सेटमा पराजित गरेर फाइनल समीकरण बनेको थियो ।
खेलमा प्रथम भएको एनबिएले ८१ हजार ८ सय नगद पुरस्कार, मेडल, ट्रफी र प्रमाणपत्र पायो । उपबिजेता रोयल बिजी गेष्ठ हाउस ४१ हजार ४ सय रुपैयाँ पुरस्कारमा चित्त बुझायो । खेलमा १६ टिम सहभागि रहेको खेल संयोजक किसोर छन्त्यालले बताए ।
मंगलबारै भएको पालिका स्तरीय महिला भलिबल प्रतियोगिताको उपाधी जैमिनी नगरपालिकाले जितेको छ । जैमिनीले ताराखोला गाउँपालिकालाई २५–१६, २५–२० र २५–१७ को स्कोरमा पराजित गरेको हो । महिला भलिबल जितेर जैमिनीले ३० हजार नगद, ट्रफी, मेडल र प्रमाणपत्र पायो । ताराखोलाले १५ हजारमा चित्त बुझायो ।
