पोखरा, १४ फागुन – नेकपा माओवादी केन्द्र निकट योङ कम्युनिस्ट लिंग (वाइसिएल) का नेता सुवास पौडेलको सडक दुर्घटनामा मृत्यु भएको छ । पौडेल वाइसिएलको केन्द्रीय स्वास्थ्य विभाग प्रमुख हुन् ।
स्याङ्जाको फेदीखोला गाउँपालिका घर भएका पौडेलले वाइसिएल स्याङ्जा जिल्ला कार्य समितिको बैठक सकेर पोखरा फर्किदै गर्दा शुक्रबार साँझ भालुपहाड सडक खण्डमा उनले चलाइरहेको मोटरसाइकल भीरबाट खसेर मृत्यु भएको हो ।
सिद्धार्थ राजमार्ग फराकिलो बनाउने काम भइरहेको सडक खण्डमा पौडेलको मोटरसाइकल चिप्लिएको हुनसक्ने प्रहरीको प्रारम्भिक अनुमान छ । पौडेल सडकबाट डेढ सय मिटर तल खसेका थिए ।
जिल्ला प्रहरी कार्यालय स्याङ्जा का निमित्त प्रवक्ता समेत रहेका इन्स्पेक्टर पदम थापाका अनुसार पौडेलको शव भिरमा अड्किएको हुँदा निकाल्न समेत कठिन भएको छ । शव निकाल्न पोखराबाट टोली मगाइएको उनले बताए ।
