म्याग्दी, ५ असार – जिल्ला समन्वय समिति म्याग्दीमा नेकपा एमालेका जिल्ला उपसचिव राजकुमार थापाको नेतृत्वमा एमालेको प्यानल नै विजयी भएको छ । राजकुमार थापा प्रमुख र दिल कुमारी खत्री उपप्रमुखसहित सबै पदमा एमालेका उमेदवार विजयी भएको मुख्य निर्वाचन अधिकृतको कार्यालयले जनाएको छ ।
आइतबार भएको मतदानमा एमालेका थापाले सात मत र उपप्रमुख खत्रीले पनि सात मत नै प्राप्त गरी विजयी भएका हुन् । मुख्य निर्वाचन अधिकृत तेजनारायण पौडेलका अनुसार अन्य सात जना सदस्यहरु भने असार १ गते मनोनयन दर्ताको क्रममा एकल उम्मेदवारी परेपछि निर्विरोध भएका थिए ।
सत्ता गठबन्धनकोतर्फबाट जिसस प्रमुख र उपप्रमुखमा उम्मेदवार रहेका नेपाली कांग्रेसका मनकुमारी विक र सोहन श्रेष्ठले पाँच पाँच मत पाए ।
सदस्यहरुमा कृष्णदत्त पौडेल पाध्या (बेनी), श्रीप्रसाद गर्बुजा (धवलागिरी) देब गर्बुजा पुन (अन्नपूर्ण), महिला सदस्यहरु कविता विक (मंगला), गौमति चपाई (मालिका), धनकुमारी सुनार (रघुगंगा) र दलित वा अल्पसंख्यकबाट जानकी विश्वकर्मा सदस्यमा निर्विरोध भएका थिए।
गत वैशाख ३० गते भएको स्थानीय तह निर्वाचनमा थापा बेनी नगरपालिका–१ बाट वडा सदस्यमा र उपप्रमुख खत्री मंगला गाउँपालिका–१ बाट वडा सदस्यमा निर्वाचित भएकी थिइन्।
जिससको निर्वाचनमा स्थानीय तहका प्रमुख/अध्यक्ष, उपप्रमुख/उपाध्यक्ष मतदाता हुन्छन्। म्याग्दीको जिसस चुनावका लागि १२ जना मतदाता रहेकोमा एमालेका ७, काँग्रेसका ३ र माओवादी केन्द्रका २ जना मतदाता थिए ।
