काठमाडौं, १ पुस – नेपाली कांग्रेसको महामन्त्री पदको मतगणना सुरु भएको छ। बिहान ९ बजे नै सुरु गर्ने भनिए पनि डेढ घण्टा ढिलागरी केही बेरअघि मतगणना सुरु भएको हो।
ललितपुरको सानेपास्थित कांग्रेस केन्द्रीय कार्यालयका तीन स्थानमा मतगणना भइरहेको निर्वाचन समितिका सचिव जगन्नाथ श्रेष्ठले जानकारी दिए।
कांग्रेसको नयाँ नेतृत्व चयनका लागि गत सोमबार निर्वाचन भएको थियो। सभापति र उपसभापतिको मतगणना सकिएपछि महामन्त्रीको मतगणना सुरु गरिएकाे हाे। दुई महामन्त्री पदका लागि गगनकुमार थापा, डा. प्रकाशशरण महत, प्रदीप पौडेल, डा.मीनेन्द्र रिजाल, डा.राजाराम कार्की र विश्वप्रकाश शर्माले उम्मेदवारी दिएका छन्।
सोमबारको मतदानमा ४ हजार ७४३ मतदातामध्ये ४ हजार ६७९ मतदाताले मतदान गरेका थिए।
कांग्रेस केन्द्रीय कार्यसमितिका पदाधिकारी र सदस्य गरी १३४ पदका लागि मतदान भएको थियो।
सभापति पदको भने महाधिवेशनस्थल राष्ट्रिय सभागृहमा बुधबार मतगणना सम्पन्न भई प्रधानमन्त्री एवं पार्टी सभापति शेरबहादुर देउवा सभापतिमा पुनः निर्वाचित भइसकेका छन्।
सभापतिबाहेक अन्य पदको मतगणना कांग्रेस केन्द्रीय कार्यालय सानेपामा सुरु गरिएको हो।
दुई उपसभापति पदको बुधबार मतगणना सम्पन्न भई पूर्णबहादुुर खड्का र धनराज गुरुङ निर्वाचित भएका छन्।
कांग्रेस केन्द्रीय कार्यसमितिका पदाधिकारीमध्ये एक सभापति, दुई उपसभापति, दुई महामन्त्री, आठ सहमहामन्त्री, आठ सहमहामन्त्रीको निर्वाचन हुने व्यवस्था छ। कोषाध्यक्ष भने निर्वाचित केन्द्रीय सदस्यमध्येबाट निर्वाचित हुने व्यवस्था कांग्रेस विधानमा छ।
यसैगरी ३५ खुला केन्द्रीय सदस्य, महिला नौ, प्रत्येक प्रदेशबाट तीन जनाका दरले २१, दलित नौ, आदिवासी/जनजाति १५, खस/आर्य १३, मधेसी नौ, थारु चार, मुस्लिम तीन, पिछडिएको क्षेत्रबाट एक, अल्पसङ्ख्यकबाट एक, अपाङ्गता भएकाबाट एक सदस्य गरी कूल १३४ पदाधिकारी तथा सदस्यको निर्वाचन हुने हालको विधानको व्यवस्था छ।
यसबाहेक केन्द्रीय सभापतिले ३३ जना मनोनीत गर्ने विधानमा उल्लेख छ।
