म्याग्दी, १६ पुस – भेडा चराउन गएका म्याग्दीका रामबहादुर छन्त्याल बेपत्ता भएका छन । म्याग्दीका सहायक प्रमुख जिल्ला अधिकारी धिरेन्द्रराज पन्तका अनुसार उनी बिहिबार बिहानै भेडा चराउन गएका थिए ।
गुर्जा भन्ने ठाउँ हिमाली जिल्ला म्याग्दीको धवलागिरी गाउँपालिका १ मा पर्दछ । छन्त्यालसँगै भेडा चराउन गएका अन्य तीनजना भने सम्पर्कमा आएका छन । गुर्जाको सुकेलोट्नेमा भारी हिउँपातका कारण भेडिगोठ बस्ने ५० वर्षीय रामबहादुर छन्त्याल बेपत्ता भएका हुन ।
बस्तीदेखि टाढाको गोठमा बस्दै आएका जगदेवी छन्त्याल, बुद्धि छन्त्याल र लालबहादुर विक भने हिउँमा फसेको म्याग्दीका प्रहरी प्रमुख डिएसपी श्यामकुमार राईले जानकारी दिए ।
घटना हुनासाथ गृहमन्त्रालयमा जानकारी गराइएको र उद्धारका लागि हेलिकोप्टर बोलाइएको सूचना अधिकारी पन्तले जानकारी दिए । गृहमन्त्रालयले हेलिकप्टर पठाएतापनि बिहिबार भने उनीहरुको उद्धार हुन सकेन । हेलिकप्टर पोखरा फर्किएको र शुक्रबार पुन उद्धार गरिने उनले जानकारी दिए ।
भौगोलिक रुपमा विकट र दुर्गम क्षेत्रमा पर्ने गुर्जा जोड्ने पदमार्ग, विद्युत र मोबाइल फोन सेवा पनि अवरुद्ध छ । छिमेकी वडा लुलाङबाट गुर्जा पुग्न एक दिन पुरै हिँड्नुपर्छ ।
यता, मनाङमा पनि बुधबारदेखि हिमपातका कारण बाटो भुलेर एकजना बेपत्ता भएका छन । भेडीगोठमा काम गर्ने नासो गाउँपालिका ४ का ५३ वर्षीय आछुयु गुरुङ बुधबारदेखि हराइरहेका छन । तीनजनाको समूहमा गएका गुरुङ भेडीगोठ सार्ने क्रममा जंगलमा हराएका हुन ।
मनाङका प्रमुख जिल्ला अधिकारी रविन्द्र प्रसाद आचार्यका अनुसार गुरुङ गोठबाट गाउँ फर्कने क्रममा बाटो भुलेर सम्पर्कविहिन भएका हुन ।
बुधबार बिहान गोठमा गएका गुरुङ जंगलमा हिउँ पर्ने हुँदा गाउँ फर्किँदै थिए । उनीभन्दा छिटो हिँड्ने साथीहरु गाउँमा फर्के । तर, व्यापक हिमपातका कारण र विस्तारै हिँड्दा उनी जंगलमा नै हराएका हुन । उनको खोजीकार्य भइरहेको प्रजिअ आचार्यले जानकारी दिए ।
