पोखरा, २७ पुस – खेल हुने÷नहुने अनिश्चयकै बीच २० औं संस्करणको आहा ! रारा गोल्डकपको समय तालिका सार्वजनिक गरिएको छ ।
कोभिडको नयाँ भेरियण्ट ओमिक्रोन बढेसँगै स्थानीय प्रशासनले भीडभाड नगर्न निर्देशन जारी गरिरहेकै बेला सोमबार आयोजक सहारा क्लब पोखराले माघ ६ देखि १५ गतेसम्म प्रतियोगिता आयोजना गर्न लागिएको जनाएको हो ।
आयोजक सहारा क्लब पोखराका अध्यक्ष सुरज गुरुङ (हरिराम)ले पोखरा रंगशालाको दर्शक क्षमता १६ हजार ५ सय रहेकाले स्वास्थ्य मापदण्ड र सामाजिक दूरी कायम गराउँदै प्रतियोगिता आयोजना गर्ने घोषणा गरे । प्रतियोगितामा यसपटक १० टिममात्रै सहभागी गराउने उनले बताए । यसअघि प्रतियोगितामा १२ टिमको सहभागिता हुँदै आएको थियो ।
सोमबार आयोजित पत्रकार सम्मलेनमा सहाराका महासचिव रामजीप्रसाद अधिकारीले निश्चित दर्शक राखेर प्रतियोगिता आयोजना गर्नका लागि स्वास्थ्य तथा सुरक्षा निकायहरुसँग छलफल भइरहेको जानकारी दिए । ‘हामी सबैले खोप लगाइसकेका छौं,सामाजिक दूरी कायम गरेर प्रतियोगिता आयोजना गर्ने हाम्रो सोच हो’,उनले भने,‘लकडाउन नै भयो भने त हाम्रो केही लाग्दैन ।’
प्रतियोगितामा आयोजक सहारा क्लब, अमेरिकाको विवाइएससी अर्थात् अमेरिका बस्ने भुटानी सरणार्थीको क्लबसहित ३ विभागीय क्लब नेपाल पुलिस, एपिएफ र त्रिभुवन आर्मी तथा संकटा, मनाङ मस्र्याङ्दी, थ्रिस्टार, मछिन्द्र र हिमालयन शेर्पा क्लबको सहभागिता रहने छ । प्रतियोगिता आयोजना गर्न १ करोड ६ लाख र आम्दानी १ करोड ३६ लाखको हाराहारीमा हुने उनले अनुमान लगाए ।
उनका अनुसार १९ औं संस्करणमा ७६ लाख ५० हजार ६ सय ४७ आम्दानी र ६३ लाख १ हजार १९९ रुपैयाँ खर्च भएको थिाये । बचत भएको १३ लाख ४९ हजार ४ सय ४७ रुपैयाँ सूर्यबहादुर केसी स्मृति सहारा फुटबल एकेडेमी संचालनमा खर्च गरिएको उनले बताए । सहाराले संचालन गरेको सो फुटबल एकेडेमीमा हाल १४ जिल्लाका २४ बालकहरु आश्रित छन् ।
क्लबले अनाथ तथा असहाय बालकहरुलाई पालनपोषणका साथमा फुटबल सिकाउँदै आएको छ ।
