पोखरा, १ फागुन – गण्डकी प्रदेश सरकारले प्रदेशभित्र चल्ने विभिन्न सवारी साधनहरूको लागि भाडा दर समायोजन गरेको छ । समायोजन गरिएको भाडादर आजदेखि लागु हुनेछ ।
भौतिक पूर्वाधार, सहरी विकास तथा यातायात व्यवस्था मन्त्रालयले प्रदेश राजपत्रमा सवारीको प्रकार अनुसारको नयाँ भाडा दर प्रकाशन गरेको छ । गण्डकी प्रदेश सरकार, मन्त्र्पिरिषद्को निर्णय बमोजिम गण्डकी प्रदेशभित्र सञ्चालन हुने सार्वजनिक तथा भाडाका सवारी साधनको भाडा दर फागुन एक गतेदेखि लागू हुने गरी निर्णय गरिएको छ ।
नयाँ भाडा दर अनुसार जिपका लागि पक्की सडकमा प्रतियात्रु प्रति किलोमिटर पाँच रुपैयाँ ५० पैसा निर्धारण गरिएको छ । यस्तै बसका लागि प्रतियात्रुको लागि प्रति किलोमिटर तीन रुपैयाँ १० पैसा तोकिएको छ ।
सिटी बसको हकमा भने दुई भागमा बाँडिएको छ । २० किलोमिटरभित्र तीन किलोमिटरसम्मको पहिलो बिन्दुमा २० रुपैयाँ र त्यसपछि भने प्रतिकिलोमिटर दुई रुपैयाँ ५० पैसा तोकिएको छ । २० किलोमिटर भन्दा बढीको यात्राका लागि प्रतियात्रु प्रतिकिलोमिटर दुई रुपैयाँ ५० पैसा निर्धारण गरिएको छ ।
यस्तै ट्रकका लागि प्रतिकिलोमिटर एक टनका लागि ११ रुपैयाँ ७२ पैसा भाडा दर तोकिएको छ ।
ट्याक्सीको लागि भने १५ किलोमिटरलाई आधार मानेर दुई थरी मूल्य कायम गरिएको छ । जसमा १५ किलोमिटरभित्रको यात्रामा फ्ल्याग डाउन ८० रुपैयाँमा १० रुपैयाँ थप गरेर ९० रुपैयाँ तोकिएको छ । थपिएको १० रुपैयाँ प्रति दुई सय मिटरमा थपिने छ । यस्तै १५ किलोमिटर भन्दा बढीको यात्रामा प्रतिकिलोमिटर ३७ रुपैयाँ ५० पैसा तोकिएको छ ।
