१.
क्षणभरमा झरेर जाने
गुलाबका पत्रहरूमा
ओइलाइरहेछ
प्रेम नामको अधुरो सपना ।
२.
बेनामी छापाखानामा छापिएका
असंख्य राता गुलाबहरूको
हिसाब गर्दै थकित तर प्रसन्न छन्
प्रेम नामका व्यापारीहरू ।
३.
नुन, तेल र सागका मुठाहरू
किन्दाकिन्दै रित्तियो पर्स
महँगो रै’छ आयातित गुलाब
यसपालि निस्तो भयो प्रेम
नरिसाऊ ल प्रिय !
४.
पार्थिव शरीरमा
अर्पण गर्न लाम लागेका
प्रेमका उदासी मनहरूका हात–हातमा
आज रातो गुलाब मात्रै देख्छु किन हो ।
५.
न गुलाब फूलेका छन् बगैँचामा
न प्रेम दिवस छ मेरो क्यालेन्डरमा
त्यसो भए,
हाम्रो प्रेम सकिएकै हो त प्रिय !
