बागलुङ, १५ फागुन – कोरोनाका कारण सुस्ताएको पर्यटन प्रबद्र्धनका लागि बागलुङको प्रसिद्ध पर्यटकीय क्षेत्र पञ्चकोटदेखि काठेखोला गाउँपालिकाको बेलढुंगासम्म युवाहरुले पदयात्रा गरेका छन् । पर्यटन व्यवसाय तथा सामाजिक विकासको क्षेत्रमा काम गर्दै आएका १२ जना युवाहरुको समुहले दुईदिने पदयात्रा सुरु गरेका हुन् ।
बागलुङ नगरपालिका-६ पञ्चकोटबाट शनिबार सुरु भएको यात्रा आइतबार काठेखोला गाउँपालिका–३ को बेलढुंगामा पुगेर सकिने यात्रामा सहभागी प्रेम केसीले बताए । पञ्चकोट–बेलढुंगा पदमार्गमा पर्ने संसारकोट, थाप्ले, गुनगुनेको धुरी, दारेगौडा लगायतका पर्यटकीय क्षेत्रको प्रचार प्रसार र प्रवद्र्धनका लागि पदयात्रा गरिएको केसीले बताए ।
काठेखोला गाउँपालिका-२ भीमापोखरामा रहेको पुष्पाञ्जली ग्रामिण विकास केन्द्रले शिवरात्रीको अवसर पारेर पदयात्राको आयोजना गरेको थियो । बागलुङ नगरपालिका र काठेखोला गाउँपालिकाका पर्यटकीय क्षेत्र समेटिएको पञ्चकोट–बेलढुंगा पदमार्गको प्रचारका लागि पदयात्रा गराईएको केन्द्रका अध्यक्ष बिक्रम शर्माले बताए । केन्द्रले गतवर्ष थाप्लेको धुरीमा सात देशका झण्डा राखेर पर्यटकलाई निम्ता दिएको थियो ।
